АҚШ Давлат департаменти ва Киевдаги элчихонаси Украина ҳудудида бўлиб турган Америка фуқароларини зудлик билан мамлакатни тарк этишга чақирди, деб ёзади «Интерфакс».
Бу, хабарда айтилишича, Давлат департаменти томонидан тарқатилган, ҳарбий ҳаракатлар кучайиши мумкинлиги ҳақидаги маълумот билан боғлиқ.
Давлат департаментининг Украинада қолаётган америкаликларга қаратилган тавсияларида портлаш овозлари ёки ҳаво тревогаси сигналлари янграган тақдирда, улар қандай тартибда ҳаракатланиши кераклиги айтилади.
Давлат департаментининг хабари Америка разведкасининг 22 август, душанба куни ошкор қилинган хулосаларига асосланган, деб ёзади АP.
Аввалроқ Америка разведкаси Россия Украинанинг давлат объектларига зарбалар беришга тайёрланаётгани ҳақида огоҳлантирганди.
Йил бошидан бери АҚШ элчихонаси бир неча бор ўз фуқароларини Украинани, шунингдек, Россияни тарк этишга чақирди. Март ойи бошида эълон қилинган тавсияларида элчихона Россияда қолишнинг ишончсизлиги сабаблари қаторида Украинадаги воқеалар, ҳаво қатнови билан боғлиқ муаммолар, Россия хавфсизлик кучлари томонидан АҚШ фуқароларига ҳужум қилиш хавфи ва терактлар эҳтимолини тилга олган. Аввал, январь ойи ўрталарида АҚШ Давлат департаменти дипломатлар ва уларнинг оила аъзолари Украинадан эвакуация қилинишини эълон қилган эди.
Изоҳ (0)