Украина инфратузилма вазири Александр Кубраков ва Туркия савдо вазири Меҳмет Муш низо натижасида вайрон бўлган Украина инфратузилмасини қайта тиклаш ҳақида битим имзолади, деб ёзади «РБК».
Haber телеканали маълумотларига кўра, шартнома икки мамлакат томонидан Украинани қайта тиклаш бўйича Мақсадли гуруҳ тузилишини кўзда тутади. Гуруҳ йўллар, кўприклар, сув ва электр таъминоти объектлари, касалхоналар ва мактаблар каби ижтимоий ва иқтисодий объектлар реконструкциясини мувофиқлаштириш билан шуғулланади.
Ҳужжатлар Украина ва Туркия президентлари Владимир Зеленский ва Ражаб Тоййиб Эрдўғон иштирокида имзоланди. Туркия етакчиси БМТ бош котиби Антониу Гутерриш билан Львовга матбуот учун ёпиқ бўлган уч томонлама учрашувни ўтказиш учун келганди.
Украина мамлакатни тиклаш учун зарур суммани 750 миллиард долларга баҳоламоқда, ушбу қийматни Киев делегацияси июль бошида Швейцарияда бўлиб ўтган махсус конференцияда маълум қилганди. Томонлар Украинага 1,9 миллиард доллар кредит ажратишга келишиб олди, бош вазир Денис Шмегал аниқлик киритишича, гап 600 миллион долларлик молиявий кўмак, аграр секторни ривожлантириш учун 500 миллион доллар, иситиш мавсумига тайёргарлик кўриш учун 500 миллион доллар ва мамлакатнинг рақамли трансформацияси учун қарийб 250 миллион доллар ҳақида бормоқда.
Украинани қайта тиклаш учун йилига тахминан 30—100 миллиард доллар ажратиш керак, деганди июль охирида Украина президенти офиси раҳбари маслаҳатчиси Тимофей Милованов. Унинг аниқлик киритишича, шундан йилига 20—30 миллиарди макроиқтисодиётни қўллаб-қувватлашга йўналтирилади, худди шунча сумма армияни қўллаб-қувватлаш учун талаб этилади.
Украина президенти Владимир Зеленский Туркия президенти Ражаб Тоййиб Эрдўғон ва БМТ бош котиби Антониу Гутерриш билан Львовда бўлиб ўтган музокаралардан кейин агар Россия қўшинлари Украинанинг босиб олинган ҳудудларини тарк этса, Россия билан музокаралар ўтказиш мумкин бўлишини маълум қилди.
Изоҳ (0)