Япония Миллий солиқ бошқармаси мамлакат ёшларини япон спиртли ичимликларини кўпроқ истеъмол қилишга ундашга қаратилган «Саке Вива!» танловини эълон қилди, деб ёзади Meduza.
Танлов ташкилотчилари 20—39 ёшдаги одамлардан спиртли ичимликларни яна оммалаштириш йўллари борасидаги ғояларини 9 сентябрга қадар юборишни сўради. Иштирокчиларга янги маҳсулотлар ва ишланмаларни тақдим этиш, шунингдек, «метаолам» ёрдамида сотишнинг янги усулларини ўрганиб чиқишни таклиф қилди.
Японияда сўнгги йилларда демографик ўзгаришлар, коронавирус пандемияси, шунингдек, ёшлар ҳаёт тарзининг ўзгариши фонида спиртли ичимликлар камроқ истеъмол қилинмоқда, бу эса солиқ тушумларига ўз таъсирини ўтказяпти. Японияда бир йиллик алкоголь истеъмоли киши бошига 1995 йилдаги 100 литрдан 2020 йилда 75 литргача тушиб қолди. 1980 йилда алкоголь савдосидан солиқ тушумлари жами миқдорнинг 5 фоизини, 2011 йилда 3 фоизини, 2020 йилда эса 1,7 фоизини ташкил қилган.
Япония Соғлиқни сақлаш вазирлиги бошланган кампания одамларга «алкоголни мақбул миқдорда» ичиш кераклигини ҳам эслатиб қўйишига умид билдирди.
Изоҳ (0)