Туркманистон 2022 йилнинг охири — 2023 йилнинг бошида ўз кемаларини яратишни режалаштирмоқда. Бу ҳақда Туркманистон денгиз ва дарё йўллари агентлиги раҳбари Аннадурди Косаев денгизга чиқиш имкони бўлмаган мамлакатлар транспорт вазирларининг халқаро конференциясида маълум қилди, деб ёзади «Хроника Туркменистана».
Миллий денгиз савдо флотини, унинг халқаро рақобатбардошлигини ошириш лойиҳаси доирасида нефть, нефть маҳсулотлари ва бошқа маҳсулотларни ташиш учун замонавий кемалар қурилмоқда, хусусан, 2018 йилда порт яқинида кема таъмирлаш заводи ҳам қурилиб, фойдаланишга топширилди. Бу ҳам мамлакатимиз учун оғир саноат соҳасида янги тармоқдир. Ҳозирда кредит олиш, инвесторларни жалб қилиш бўйича музокаралар олиб борилмоқда, мутахассислар ва маслаҳатчиларни жалб қилган ҳолда шу йил охири ёки келаси йил бошида ўз кемаларимизни қуришни режалаштирганмиз, — деди расмий.Косаевнинг аниқлик киритишича, биринчи навбатда қуруқ юкларни ташувчи кемаларни қуриш бошланади.
2021 йилнинг октябрь ойида Туркманистон Вазирлар Маҳкамаси ҳузуридаги Транспорт ва коммуникациялар агентлиги директори Мамметхон Чакиев ўша пайтдаги президент Гурбангули Бердимуҳамедовга «Ҳазар логистик» якка тартибдаги корхонаси «Болқон» кема қуриш ва таъмирлаш заводида юк кўтариш қуввати 5300–8100 тонна бўлган қуруқ юк кемасини қуришни режалаштираётгани ҳақида ҳисобот берган эди.
Кейин декабрь ойида Ашхобод ОПЕК (Нефть экспорт қилувчи давлатлар ташкилоти) фондидан денгиз савдо флотини ривожлантириш учун 45 миллион доллар кредит олиши маълум бўлди. Хусусан, учта кема қурилиши режалаштирилган: қуруқ юк ташувчи кема, йўловчи ташувчи кема ва темир йўл юкларини ташувчи кема.
Янги денгиз порти, шунингдек, Туркманбоши шаҳридаги «Болқон» кемасозлик заводи 2018 йилнинг май ойида фойдаланишга топширилган. Уларнинг қурилиши 1,5 миллиард долларга тушган. Ўшанда завод қуввати йилига 4—6 та кема қуришга етар экани маълум қилинганди. Айни пайтгача «Болқон»да битта ҳам кема ишлаб чиқарилмаган.
Изоҳ (0)