Агар Британия ташқи ишлар вазири Лиз Трасс бош вазир этиб сайланса, у биринчи бўлиб Украина президенти Владимир Зеленскийга қўнғироқ қилади ва ўз қўллаб-қувватловини билдиради. Бу ҳақда Трасс The Daily Telegraph нашрига берган мақоласида айтиб ўтди.
«Менинг унга мурожаатим қандай бўлиши аниқ: Буюк Британия Украинага ўз келажаги учун курашда ғалаба қозонишда қўлидан келган барча ёрдамни беради», — деб ёзади у.
Трасс Киевни зарур қурол ва жиҳозлар билан тўлиқ таъминлаш учун Лондоннинг иттифоқчилари билан яқиндан ҳамкорлик қилишга ваъда берди, шунингдек, Россияга қарши янги санкциялар жорий этиш ниятида эканини таъкидлади. Сиёсатчининг сўзларига кўра, у «янги Маршалл режаси орқали Украинани тиклаш бўйича муҳим халқаро саъй-ҳаракатларни» мувофиқлаштиради.
«Бош вазир сифатида мен Буюк Британияни жаҳон саҳнасида алоҳида ажралиб туришини таъминлайман. Биз авторитар раҳбарлар ва потенциал тажовузкорларни куч билан эмас, ўз эътиқодимиз билан тийиб турамиз. Эркинлик, суверенитет ва ўз тақдирини ўзи белгилашнинг янги даврида биргаликда ғалаба қозонамиз», — деди Трасс.
Трасс Молия вазирлигининг собиқ канцлери Риши Сунак билан бирга Консерватив партия аъзолари ўртасидаги сайловларнинг якуний босқичига чиқди. Ғолиб консерваторлар раҳбари ва Буюк Британиянинг янги бош вазирига айланади. Янги бош вазир ким бўлиши 5 сентябрь куни маълум қилинади.
Иккала номзод ҳам қиролликнинг можарога бевосита аралашувисиз Украинага ҳарбий-техник ёрдам кўрсатишни давом эттириш ниятида эканини маълум қилган.
Изоҳ (0)