Си Цзиньпин Байденни «ўт билан ўйнашган куйиб қолиши» ҳақида огоҳлантирди

Хитой раиси ва мамлакат компартияси бош котиби Си Цзиньпин Тайвань минтақасида кескинлик ошаётган бир пайтда АҚШ президенти Жо Байденни «олов билан ўйнашган одам куйиб қолиши» ҳақида огоҳлантирди, деб ёзади «РБК».

Унинг таъкидлашича, Хитой халқи Тайвань масаласида «Хитойнинг миллий суверенитети ва ҳудудий яхлитлигини қатъий ҳимоя қилиш кайфиятида». У оролнинг ўзи томонидан эълон қилинган мустақиллигини тан олмаслигини қўшиб қўйди.

Байден, ўз навбатида, АҚШ «ягона Хитой» сиёсатига содиқлигига ишонтирган. Шунга қарамай, Bloomberg агентлиги АҚШ Давлат департаменти баёнотида ушбу суҳбат, аввалги қўнғироқлардан фарқли равишда, «конструктив» деб аталмаганига эътибор қаратди.

28 июль, пайшанба куни Байден Си Цзиньпин билан икки соатлик музокаралар ўтказди. АҚШ Миллий хавфсизлик кенгашининг стратегик коммуникациялар бўйича координатори Жон Кирби суҳбат мавзусини ошкор қилмади.

CNN маълумотларига кўра, бу икки мамлакат етакчиларининг 2022 йил бошидан буён бешинчи марта қўнғироқлашишидир.

Хитой ва АҚШ ўртасидаги кескин муносабатлар бир неча йилдан буён сақланиб қолмоқда. Чунончи, Дональд Трамп президентлиги даврида Вашингтон, шу жумладан, Тайвань масаласи туфайли Пекинга санкциявий босимни кучайтирганди. Тайвань атрофидаги вазият сўнгги вақтларда АҚШ вакиллар палатаси спикери Нэнси Пелосининг яқин орада оролга ташриф буюриш режаси сабабли кескинлашди.

Хитой АҚШ раҳбариятини бир неча марта ташрифдан воз кечишга чақириб, «ягона Хитой» сиёсатига содиқлик АҚШ зиммасига юклайдиган мажбуриятлар ҳақида эслатди.

Агар Пелосининг ташрифи амалга ошса, у 25 йил ичида Тайванга ташриф буюрган биринчи АҚШ конгресси палатаси спикерига айланади.

Шу билан бирга, АҚШ президенти ҳарбийлар ушбу ташаббусни мақбул деб ҳисобламаслигини айтди. CNN маълумотларига кўра, Оқ уй Хитой Пелосининг ташрифини чиппакка чиқариш учун Тайвань ҳаво ҳудудини парвоздан ташқари зона деб эълон қилишидан хавотирда. Шунингдек, Пекин оролга қирувчи самолётларни йўналтириши, бу эса Тайбэй ва Вашингтоннинг жавоб чораларига сабаб бўлиши мумкин.

ХХР Ташқи ишлар вазирлиги Пелосининг эҳтимолий ташрифига «жиддий тайёргарлик» кўраётганини маълум қилди.

Тайван Хитойдан ажралиб чиққани ҳақида 1949 йилда, фуқаролар уруши даврида эълон қилган. Пекин оролнинг мустақиллигини тан олмайди ва уни ўз провинцияси деб ҳисоблайди. АҚШ оролда эълон қилинган Хитой республикаси билан дипломатик алоқалар ўрнатмаган бўлса-да, 1979 йилдан буён амал қилиб келувчи қонунга кўра, минтақага ўзини ҳимоялаш учун қурол етказиб бера олади.