Антикоррупция агентлигига йўлланган мурожаатларни ўрганишда 30,4 млрд сўмлик молиявий хато ва камчилик аниқланди

Коррупцияга қарши курашиш агентлигига келиб тушган мурожаатларни ўрганиш давомида 30,4 миллиард сўмлик молиявий хато ва камчиликлар аниқланган. Бу ҳақда АОКАда агентлик ахборот хизмати раҳбари Дурдона Очилова иштирокида ўтказилган брифингда айтиб ўтилди.

Шунингдек, мурожаатлар асосида қонун ҳужжатларига зид равишда чиқарилган 9 та ҳужжат бекор қилинган, агентлик томонидан тақдим этилган ҳужжатларга асосан ҳуқуқни муҳофаза қилувчи органлар томонидан 7 та жиноят иши, 4 та маъмурий жавобгарлик ва 2 та интизомий жавобгарлик тўғрисидаги ишлар қўзғатилган.

Бундан ташқари, давлат харидларига оид қонун талабларига риоя қилиниши юзасидан жами 10 та вазирлик, идора ва ташкилотда ўтказилган ўрганишларда 1143 та ҳолатда 48,5 миллиард сўмлик молиявий хато ва камчиликлар аниқланган.