Россия президентининг матбуот котиби Дмитрий Песков Владимир Путин келгуси ҳафта Эронга ташриф буюришини тасдиқлади. 19 июль куни Россия раҳбари Ислом республикасига учиб, у ерда Туркия президенти Ражаб Тоййиб Эрдўғон ва Эрон президенти Иброҳим Раисий билан учрашади. Владимир Путиннинг ташрифи ҳақида аввалроқ Эрон томони хабар берган эди.
«Уч томонлама учрашувдан ташқари, албатта, икки томонлама учрашувлар ҳам бўлади. Кеча биз Путин ва Эрдўғон ўртасида кутилаётган олий даражадаги мулоқотлар ҳақида хабар берган эдик ва бу учрашув ҳам ўша ерда (Эронда — таҳр.) бўлиб ўтади», — деди матбуот котиби президентнинг бўлажак ташрифи тафсилотларига тўхталиб.
Украинада уруш бошланганидан кейин Владимир Путин хорижга бор-йўғи икки марта ташриф буюрди: Тожикистон ва Туркманистонга. Март ойида Россия жорий этилган санкциялар сони бўйича Эронни ортда қолдириб, унга нисбатан энг кўп чекловлар қўйилган давлатга айланди. Эрон Марказий банки Ислом республикаси Ғарб санкцияларини четлаб ўтиш тажрибасини Россия билан ўртоқлашгани ҳақида хабар берди.
Изоҳ (0)