Туркияда дам олаётган сайёҳлар ўзларини акуладан швабра ёрдамида ҳимоя қилди, деб ёзади Tengrinews.
Ҳодиса Туркия жануби-ғарбидаги Мармарис курорти соҳилларида юз берди. Интернетда тарқалиб кетган видеода акула пляжга сузиб келганини ва у ерда дам олаётган одамларга яқин келганини кўриш мумкин. Сайёҳлардан бири полювгични олиб, акулани қува бошлаган ва унинг бошига бир неча марта урган.
Кадрларда акуланинг сузгичи ва думини кўриш мумкин. Аммо Мармарис ҳукумати у акула бўлмаганини маълум қилди.
«Пляжда сайёҳлар кўриб, акула деб ўйлаган балиқ аслида Ўртаер денгизи саргани бўлган. Мутахассислар фикрича, у безарар жонивор. Шунинг учун ҳам чўмилишга борганда ўзингиз билан швабра олишингиз керак эмас», — дейилади баёнотда.
Таъкидланишича, Ўртаер денгизида акулаларнинг 47 та тури яшайди. Уларнинг қарийб 20 таси йирик ҳажмда бўлса, 15 таси назарий жиҳатдан одамга зарар етказиши мумкин.
Эслатиб ўтамиз, 3 июль куни Мисрнинг Хургада курорт шаҳрида акула сайёҳга ҳужум қилган эди. Воқеа Сахл-Хашиш курорти яқинида юз берган. Оқибатда аёл қўли ва оёғидан айрилган. У касалхонада вафот этган. Кейинроқ Миср Атроф-муҳит вазирлиги яна бир аёлнинг ўлими ҳақида эълон қилди. Шундан кейин Миср ҳукумати икки сайёҳнинг акула ҳужуми оқибатида ҳалок бўлиши ортидан Қизил денгиз соҳилидаги бир нечта пляжларни ёпди.
Изоҳ (0)