Канада парламенти Жамоатлар палатаси аъзолари Швеция ва Финляндиянинг НАТОга қўшилиши тўғрисидаги протоколни бир овоздан ратификация қилди. Шу тариқа Канада Швеция ва Финляндиянинг НАТОга аъзолигини расман тасдиқлаган биринчи давлат бўлди. Энди Шимолий Атлантика альянсига аъзо яна 29 та давлат ҳам худди шундай тартибдан ўтиши керак.
«Аъзоликни ратификация қилиш учун маъмурий жараённи қўллашдан олдин, ташқи ишлар вазири Мелани Жоли қонунчилар билан гаплашди ва уларнинг розилигига ишонч ҳосил қилди», — деди Канада Ташқи ишлар вазирлиги вакили.
«Биз конвенцияни ратификация қилган биринчи давлат бўлишни хоҳладик», — дея қўшимча қилди у.
«Канада Финляндия ва Швециянинг НАТОга тез ва самарали интеграция қилиш ва альянснинг жамоавий мудофаасига ҳисса қўшиш қобилиятига тўлиқ ишонади», — деган Канада бош вазири Жастин Трюдо баёнотида.
5 июль куни Финляндия ва Швеция ТИВ раҳбарлари альянс бош қароргоҳида НАТОга кириш тўғрисидаги протоколларни имзолаган эди. Ҳужжатларни НАТОга аъзо 30 та давлат элчилари ҳам имзолаган. Зарур ҳужжатлар альянс таркибидаги барча давлатлар томонидан ратификация қилингандан сўнг Финляндия ва Швеция НАТОга аъзо бўлади.
НАТО бош котиби Йенс Столтенберг икки давлатнинг аъзолигини ратификация қилиш жараёни бошланганини эълон қилган.
Эслатиб ўтамиз, май ойида Финляндия ва Швеция Россиянинг Украинадаги ҳарбий амалиёти туфайли альянсга қўшилиш учун ариза берган эди. Туркия ҳар икки давлатни террорчиларни яширишда айблаб, ўларнинг аъзолигига қарши чиқди. Бир неча раунд музокараларидан сўнг Анқара альянснинг кенгайишига тўсқинлик қилмасликка рози бўлди. Бироқ бунинг учун Туркия президенти Ражаб Тоййиб Эрдўғон Швеция ва Финляндиядан қонунларни ўзгартиришни талаб қилди.
Изоҳ (0)