42 давлат раҳбарияти вакиллари Швейцариянинг Лугано шаҳрида Украинани тиклаш бўйича конференциянинг якуний декларациясини имзолади. Улар Украинанинг халқаро миқёсда тан олинган чегаралари доирасидаги суверенитети ва ҳудудий яхлитлигини тўлиқ қўллаб-қувватлашини тасдиқлади.
Декларацияни имзолаган давлатлар Украина ташаббуси билан ишлаб чиқилган Тикланиш ва ривожланиш режаси лойиҳасини кўплаб манфаатдор томонлар ва ҳамкорларнинг келишилган иштирокини таъминловчи асосий асос ҳужжати сифатида тан олди.
Шунингдек, улар Украина ҳукумати ҳамда барча икки томонлама ва кўп томонлама шериклар, ташкилотлар ва халқаро молия институтлари ўртасида тикланиш ва ривожланиш режасини тайёрлаш ҳамда амалга ошириш учун самарали мувофиқлаштирувчи платформа яратишни қўллаб-қувватлади.
Улар Украинани қайта қуриш жараёнида халқаро қоидалар, стандартлар ва тан олинган тамойилларга мувофиқ ривожланишни адолатли ва шаффоф молиялаштириш, кредитлаш ва қарз олиш муҳимлигини таъкидладилар.
4 июль куни Украина бош вазири Денис Шмигал Луганода Украинани тиклаш режаси аллақачон 750 миллиард долларга баҳоланаётганини маълум қилди ҳамда «Россия ва россиялик олигархларнинг мусодара қилинган активлари тикланишнинг асосий манбайи бўлиши керак», дея фикр билдирди.
Иқтисодиётни тиклаш манбалари қаторида бош вазир халқаро грантлар, халқаро молия институтларининг имтиёзли кредитлари, хусусий сектор инвестициялари ҳамда жисмоний ва юридик шахсларнинг бюджетдан ташқари ажратмаларини қайд этди. Мамлакат тикланишининг яна бир манбайи Украинанинг ўз бюджети бўлади.
Изоҳ (0)