Kanada parlamenti Jamoatlar palatasi a’zolari Shvetsiya va Finlyandiyaning NATOga qo‘shilishi to‘g‘risidagi protokolni bir ovozdan ratifikatsiya qildi. Shu tariqa Kanada Shvetsiya va Finlyandiyaning NATOga a’zoligini rasman tasdiqlagan birinchi davlat bo‘ldi. Endi Shimoliy Atlantika alyansiga a’zo yana 29 ta davlat ham xuddi shunday tartibdan o‘tishi kerak.
“A’zolikni ratifikatsiya qilish uchun ma’muriy jarayonni qo‘llashdan oldin, tashqi ishlar vaziri Melani Joli qonunchilar bilan gaplashdi va ularning roziligiga ishonch hosil qildi”, — dedi Kanada Tashqi ishlar vazirligi vakili.
“Biz konvensiyani ratifikatsiya qilgan birinchi davlat bo‘lishni xohladik”, — deya qo‘shimcha qildi u.
“Kanada Finlyandiya va Shvetsiyaning NATOga tez va samarali integratsiya qilish va alyansning jamoaviy mudofaasiga hissa qo‘shish qobiliyatiga to‘liq ishonadi”, — degan Kanada bosh vaziri Jastin Tryudo bayonotida.
5-iyul kuni Finlyandiya va Shvetsiya TIV rahbarlari alyans bosh qarorgohida NATOga kirish to‘g‘risidagi protokollarni imzolagan edi. Hujjatlarni NATOga a’zo 30 ta davlat elchilari ham imzolagan. Zarur hujjatlar alyans tarkibidagi barcha davlatlar tomonidan ratifikatsiya qilingandan so‘ng Finlyandiya va Shvetsiya NATOga a’zo bo‘ladi.
NATO bosh kotibi Yens Stoltenberg ikki davlatning a’zoligini ratifikatsiya qilish jarayoni boshlanganini e’lon qilgan.
Eslatib o‘tamiz, may oyida Finlyandiya va Shvetsiya Rossiyaning Ukrainadagi harbiy amaliyoti tufayli alyansga qo‘shilish uchun ariza bergan edi. Turkiya har ikki davlatni terrorchilarni yashirishda ayblab, o‘larning a’zoligiga qarshi chiqdi. Bir necha raund muzokaralaridan so‘ng Anqara alyansning kengayishiga to‘sqinlik qilmaslikka rozi bo‘ldi. Biroq buning uchun Turkiya prezidenti Rajab Toyyib Erdo‘g‘on Shvetsiya va Finlyandiyadan qonunlarni o‘zgartirishni talab qildi.
Izoh (0)