Россияда бу йил президент Владимир Путин билан «жонли мулоқот» ўтган йилларга нисбатан кечроқ бўлиб ўтади. Бу ҳақда унинг матбуот котиби Дмитрий Песков маълум қилди.
«Жонли мулоқот — у албатта бўлади. У ҳақда унутганимиз йўқ, қайтага ҳозир у талабгир», — деди Песков.
Шу билан бирга, Кремль вакили таъкидлашича, «ҳозир президентнинг муҳимроқ тадбирлари жуда кўп». «Шунинг учун — сал кейинроқ. Лекин албатта бўлади», — дея ишонтирди у.
Аввалроқ Песков жонли мулоқот 15—18 июнь кунлари бўлиб ўтган Петербург халқаро иқтисодий форумидан кейин ўтказилишини айтганди. Кейинроқ эса у Путин билан жонли мулоқот июнда бўлиб ўтишини истисно қилди.
«Жонли мулоқот» 2001 йилдан бошлаб ҳар йили ўтказилади, у фақат 2004, 2012 ва 2020 йилларда амалга ошмаган. Эфирда фуқаролар Путинга ўз саволларини беради, у эса жавоб беради. 2020 йилда пандемия бошлангани сабабли жонли мулоқот бекор қилинган.
2021 йилдаги мулоқот 30 июнь куни ўтказилган. Дастур 3 соат-у 42 дақиқа давом этган, давлат раҳбарига 2,2 миллиондан ортиқ саволлар юборилган, у 68 тасига жавоб беришга улгурган.
Ўртача ҳисобда тадбир икки соатдан тўрт соатгача давом этади. «Жонли мулоқот» 2011 йилда энг узоқ давом этган бўлса (4 соат-у 32 дақиқа), 2001 йилда энг қисқа бўлган (2 соат-у 20 дақиқа).
Изоҳ (0)