Америка ОАВлари Украинадаги урушда яна бир АҚШ фуқароси ҳалок бўлганини ёзмоқда

Америка оммавий ахборот воситаларининг хабар беришича, Украинадаги урушда иккинчи АҚШ фуқароси ҳалок бўлган.

Recorder нашрида эълон қилинган таъзияномага кўра, 52 ёшли Стивен Забелски 15 май куни Запорожьенинг Дорожнянка қишлоғидаги жангда ҳалок бўлган.

Rolling Stone нашрининг ёзишича, украиналик ҳарбийлар томонида жанг қилган АҚШ армияси фахрийси минада портлаб кетган.

The Washington Post газетаси АҚШ Давлат департаментидан Забелскининг ўлими ҳақидаги тасдиқномани олди. Дипломатларнинг айтишича, улар марҳумнинг оиласи билан контактда бўлиб, унинг оиласига барча зарур консуллик ёрдамини кўрсатган. Давлат департаменти қўшимча изоҳ беришдан бош тортган.

Украинадаги урушда илк бор Америка фуқароси ҳалок бўлгани ҳақида апрель ойининг охирида маълум бўлганди — марҳум 22 ёшли собиқ денгиз пиёдаси, хусусий ҳарбий компания ходими Уилл Жозеф Кенсел бўлиб чиқди.

Шунингдек, АҚШ расмийлари Украина томонида жанг қилган уч нафар америкалик бедарак йўқолгани ҳақида хабар берди. Улар орасида Александр Дрюк ва Энди Хьюйн бор. Улар, The Daily Telegraph нашрининг ёзишича, 15 июнь куни Харьков яқинидаги жангда асирга олинган. Кремль асирга олинган америкаликлар рус аскарларига қарши содир этган жиноятлари учун жазоланиши кераклигини айтди.

Россия Мудофаа вазирлиги маълумотларига кўра, уруш бошланганидан бери Украинага жанговар ҳаракатларда қатнашиш учун 6956 нафар хорижлик келган, улардан 1779 нафари мамлакатни тарк этган, 1956 нафари ҳалок бўлган.