Исроилнинг собиқ бош вазири, мухолифатдаги «Ликуд» партияси етакчиси Бенямин Нетаньяху Кнессет (парламент)нинг тарқатилиши ҳақидаги хабарлардан сўнг, янги ҳукуматни шакллантириб, унга раҳбарлик қила олишига ишонч билдирди. Бу ҳақда The Times of Israel хабар барди.
«Сафдошларим ва мен кенг кўламли миллий ҳукумат тузамиз, уни мен бошқараман ва ушбу ҳукумат барча исроилликларга истисносиз ғамхўрлик қилади», — деди Нетаньяху.
Сиёсатчининг ишонтириб айтишича, агар у бош вазир лавозимига қайтса, унинг ҳукумати «солиқларни, нархларни пасайтиради ва Исроилни энг юқори ютуқлар ва қўшимча тинчлик келишувлари сари етаклайди».
Нетаньяху Кнессетнинг тарқатилиши кутилаётгани ва амалдаги бош вазир Нафтали Беннетнинг истеъфога чиқишини «миллионлаб исроилликлар учун ажойиб янгилик» деб атади. Амалдаги коалиция келишувига кўра, Беннет амалдаги ташқи ишлар вазири Яир Лапидга ўрнини бўшатиб беради.
«Кнессетдаги мухолифатнинг бир йиллик шиддатли кураши ва Исроил халқининг оғир изтироблари ортидан Исроил тарихидаги ушбу энг омадсиз ҳукумат ўз ниҳоясига етгани барчага аён», — деди сиёсатчи.
Аввалроқ, 20 июнь куни Беннет ва Лапид бир ҳафта ичида Кнессетни тарқатиб юборишга ва кейинги сайловларгача коалиция келишуви доирасида Вазирлар Маҳкамаси раҳбарининг вазифаларини Ташқи ишлар вазирлиги раҳбарига ўтказишга келишиб олган эди. «Биз ҳукуматни сақлаб қолиш учун ҳамма нарсани қилдик. Парламентни тарқатиб юбориш тўғрисидаги қарор Исроил учун тўғри қарор», — деди Беннет.
Беннетнинг «Ямина» партияси ва Лапиднинг «Еш Атид» партиясии бошчилигидаги коалиция 2021 йил 23 мартда бўлиб ўтган парламент сайловларидан сўнг Вазирлар Маҳкамасини тузган эди. Шундан сўнг, ўша йилнинг 13 июнида Беннет сўнгги 12 йил давомида — 2009 йилдан бери бош вазир бўлиб келган Бенямин Нетаньяхунинг ўрнини эгаллади. Умумий ҳисобда Нетаньяху Вазирлар Маҳкамаси раҳбари сифатида 15 йил ишлаган — бу мустақил Исроил тарихидаги рекорд давр.
Изоҳ (0)