Россиянинг Буюк Британиядаги элчиси Андрей Келин ва бошқа россиялик дипломатларга, алоҳида хабар берилмагунича, Британия парламенти биносига кириш тақиқлаб қўйилди, деб ёзади «РБК». Бу ҳақда The Guardian газетаси лордлар палатаси ва жамоатчилик палатаси спикерлари томонидан тарқатилган хабарга таяниб маълум қилган.
«Россия ҳукуматининг расман аккредитация қилинган вакили сифатида, элчи [Андрей Келин] яна хабар берилмагунича, парламент қароргоҳига қўйилмайди», — дейилади хабарда.
Нашр қайд этишича, россиялик дипломатлар ва расмий шахслар учун тақиқ Британияда биринчи марта ёзма шаклда тасдиқланган.
Россиянинг Украинадаги ҳарбий операцияси бошланганидан буён россиялик дипломатларга тадбирларда қатнашиш бир неча марта тақиқланганди.
Хусусан, концлагернинг озод этилишига 77 йил тўлишига бағишланган хотирлаш маросимига «Бухенвальд» ва «Дора-Миттельбау» ёдгорлик мажмуалари маъмурияти россиялик ва беларуслик мансабдорларни киритмаган эди.
Май ойи бошида баъзи Европа мамлакатлари, масалан, Австрия ва Франциядаги Россия элчихоналари 8 май куни нацистлар истилосидан озод бўлиш ва Иккинчи жаҳон уруши тугаши хотирасига аталган тадбирга таклиф этилмагани ҳақида билдиришнома олган.
Россиянинг Япониядаги элчиси Михаил Галузин Хиросима маъмурияти россиялик дипломатларни 6 август куни АҚШ томонидан атом бомбардимони қурбонлари хотирасига бағишланган тадбирга таклиф қилишдан бош тортганини айтганди. Элчи Россияни таклиф қилишдан бош тортишни «уятли қадам» деб атаган эди.
Изоҳ (0)