Россиялик журналист Дмитрий Муратов Нобель медалини аукционда 103,5 млн долларга сотди

2021 йилги тинчлик бўйича Нобель мукофоти совриндори, Россиянинг «Новая газета» нашри бош муҳаррири Дмитрий Муратовнинг медали аукционда 103,5 миллион долларга сотилди, деб ёзади «РБК» Американинг кимошди савдосини ўтказган Heritage Auctions савдо уйига таяниб.

Аукцион бошланишидан олдин журналистдан ҳақиқатан ҳам медалини сотишга тайёрлиги ҳақида сўрашди. Муратов тасдиқ жавобини берди. Аввалроқ у мукофотни сотиш қарорини «Новая газета»нинг бутун жамоаси қўллаб-қувватлаганини айтганди.

Лотнинг бошланғич қиймати 700 минг долларни ташкил қилди, аммо бир неча дақиқа ичида нарх 16,6 миллион долларгача кўтарилди. Сўнг аноним харидор медалга 103,5 миллион доллар тикди, бу ставкадан аукционнинг ҳеч бир иштирокчиси оша олмади.

Савдо уйи хабарида айтилишича, медални сотишдан тушган пулларнинг барчаси БМТнинг халқаро Болалар жамғармаси (UNICEF)га Украина ва қўшни мамлакатлардаги болаларга ёрдам бериш учун йўналтирилади. Шунингдек, маблағларнинг бир қисми Украинадан чиққан қочқинлар ва мамлакат ичкарисида кўчирилганларнинг оилаларига кўмак беришга сарфланади.

Кимошди савдоси Нью-Йоркда, Манхэттендаги Таймс марказида бўлиб ўтди ва 20 июнда нишоналандиган Жаҳон қочқинлар кунига бағишланди.

Эслатиб ўтамиз, 2021 йил 8 октябрь куни тинчлик бўйича Нобель мукофотига Россиянинг «Новая газета» нашри бош муҳаррири Дмитрий Муратов ва филиппинлик журналист, Rapple мухолифатчи сайти раҳбари Мария Ресса сазовор бўлди. Нобель мукофоти уларга «демократия ҳамда барқарор тинчлик ўрнатилишининг дастлабки шарти бўлган фикр билдириш эркинлигини ҳимоя қилиш бўйича интилишлари» учун берилган.

2021 йил декабрида Дмитрий Муратов ваъда қилганидек, ўзига берилган тинчлик бўйича Нобель мукофоти маблағларини хайрияга топширди. Мукофотнинг умумий суммаси қарийб 40,2 миллион рублни (546 минг доллар) ташкил этган. Пул ташкилотлар ўртасида тақсимланган бўлиб, улар «шериклар» – «Новая газета»ни хайрия билан қўллаб-қувватлаган ўқувчилар орасидан овоз бериш йўли билан танланган.

Дмитрий Муратов — «Новая газета» асосчиларидан бири бўлиб, 1995 йилдан буён нашрга бош муҳаррирлик қилиб келади. Газета инсон ҳуқуқлари бузилиши мавзусидаги суриштирувлар ва мақолалари билан таниқли.

28 март куни «Новая газета» ўз фаолиятини вақтинчалик тўхтатди. Бу «Роскомнадзор» нашрга мақолада нотижорат ташкилот-хорижий агент маркировкаси йўқлиги туфайли иккинчи марта огоҳлантириш юборганидан кейин юз берди.

Таҳририятнинг баъзи ходимлари чет элга кетиб, «Новая газета. Европа» нашрини очди. 29 апрель куни «Роскомнадзор» унинг сайтини Россия ҳудудида блоклаб қўйди.