«Россия Ғарбга ортиқ ҳеч қачон ишонмайди» — Песков

Россия Ғарбга ортиқ ҳеч қачон ишонмайди, деди Россия президенти матбуот котиби Дмитрий Песков Американинг NBC телеканалига берган интервьюсида.

«Бу узоқ давом этадиган инқироз бўлади. Биз Ғарбга энди ҳеч қачон ишонмаймиз», — деди у.

24 февраль куни Украинада уруш бошланганидан кейин Россиянинг Ғарб давлатлари билан муносабатлари кескин ёмонлашди. Ғарб Россияга қарши унинг раҳбарияти, банклари ва айрим тармоқларига таъсир кўрсатган бир қанча санкциялар пакетини киритди. Москва бунга жавобан мамлакатга қарши санкциялар жорий қилган давлатларни дўстона бўлмаган давлатлар рўйхатига киритди. Уларга газ учун тўловларни рублда амалга ошириш шарт этиб қўйилди. Россия, шунингдек, АҚШ, Европа Иттифоқи ва Буюк Британиянинг баъзи расмийлари, дипломатлари ва ишбилармонларига мамлакатга киришини тақиқлади ва бошқа носимметрик чоралар кўрди.

Россия ёки унинг раҳбарияти билан эски муносабатларни тиклашнинг иложи йўқлиги ҳақида Ғарб давлатларининг айрим сиёсатчилари гапирган. Хусусан, Буюк Британия бош вазири Борис Жонсон, АҚШ давлат котиби Энтони Блинкен ва Финляндия бош вазири Санна Маринлар шундай баёнотлар билан чиқишган.

Россия ташқи ишлар вазири Сергей Лавров, ўз навбатида, Россия Ғарб билан муносабатларни қайта тиклаш масаласини, ҳатто Ғарбнинг ўзи буни таклиф қилган тақдирда ҳам жиддий ўйлаб кўришини айтди. Федерация Кенгаши спикери Валентина Матвиенко «Европага ойна» очмасликка чақирди ва бу фойдали бўлса-да, аммо ҳозирча «Россияга бундай Ғарб билан алоқалар керак эмас»лигини айтди.