Ўрмон ёнғинлари сабаб Германия, Греция ва Испания аҳолисини эвакуация қилишга тўғри келди, деб ёзмоқда Deutsche Welle нашри.
Ёз бошида юқори ҳарорат ва кучли шамоллар Германиянинг шарқий ерларига етиб борган ва Берлиннинг жануби-ғарбида ёнғин келтириб чиқарган.
Мамлакат миллий метеорология агентлигининг маълум қилишича, аввалига Германия ғарбида, сўнг мамлакат шарқида ҳаво ҳарорати Цельсий бўйича 38 даражадан ошган. 20 га яқин провинция аҳолисини эвакуация қилиш буюрилган. Бранденбург штатидаги Треуэнбритзен шаҳри маҳаллий ҳокимият биноси эвакуация қилинганлар учун фавқулодда бошпана вазифасини ўтамоқда.
Ўт ўчириш бўлими вакилининг айтишича, ўрмон ёнғинлари 100—110 гектарга яқин майдонни қамраб олган. Ёнғинни ўчиришга ҳарбий вертолёт сафарбар этилган.
Шунингдек, Грециядаги иккинчи йирик орол Эвия марказида ўрмон ёнғини назоратдан чиқиб кетди. Кучли шамол туфайли олов Гаядаги тоғ ўрмонининг ён бағирлари бўйлаб тарқалди.
Расмийлар эҳтиёт чораси сифатида Кремастос қишлоғини эвакуация қилишни буюрди — у ерда ёнғин баъзи уйларга 800 метргача яқинлашган. Ерда 70 га яқин ўт ўчирувчи ёнғин билан курашган, уларга 9 та ўт ўчириш самолёти ва 4 та вертолёт ёрдам берган.
Эвия ўтган ёзда ҳам даҳшатли ўрмон ёнғинларига дуч келган эди — табиий офат оролдаги ўрмоннинг учдан бир қисмини йўқ қилган.
Айни пайтда, Испаниядаги ўт ўчирувчилар, мамлакатда июнь ойи учун рекорд ҳароратни келтириб чиқарган жазирама тўлқини оқибатида бир неча кундан бери давом этаётган ўрмон ёнғинига қарши курашмоқда. Испаниянинг кўплаб шаҳарларида термометрлар Цельсий бўйича 40 даражадан ошган.
Минтақавий ҳокимият маълумотларига кўра, энг кўп зарар шимоли-ғарбий Самора провинциясида кўрилган, у ерда 25 минг гектардан ортиқ ер ёниб кетган. Ўрмон ёнғинлари Каталония шимоли-шарқининг уч қисмида — Лерида, Таррагона ва Барселона жанубидаги Гарраф табиий боғида фаол бўлган. Испаниялик ўт ўчирувчилар ўтган ҳафтада биргина Каталониянинг ўзида 200 дан ортиқ турли ўрмон ёнғинларига дуч келганини айтди.
Айни пайтда мутахассислар юқори ҳарорат иқлим ўзгаришидаги хавотирли тенденциялардан келиб чиққани ҳақида огоҳлантирди.
«Бугун биз кўраётган манзара, афсуски, келажак хабарчисидир», — деди Женевадаги Бутунжаҳон метеорология ташкилоти матбуот котиби Клер Нуллис.
Изоҳ (0)