Россия Хитойга рекорд даражада кўп нефть экспорт қилди

Россия нефтининг Хитойга экспорти май ойи якунларига кўра, рекорд кўрсаткич — 8,42 миллион тоннагача етди, деб ёзади Meduza.

Хитой Халқ Республикаси Божхона бош бошқармаси маълумотларига кўра, май ойида Россия Хитойга суткасига тахминан 1,98 миллион баррель нефть юборган ва экспорт ҳажмини аввалги йилнинг шу даврига нисбатан 55 фоизга оширган.

Россия Хитойга нефть экспорт қилувчи мамлакатлар орасида биринчи ўринга чиқиб олган, ўтган бир ярим йил давомида ушбу кўрсаткич бўйича етакчилик қилган Саудия Арабистони иккинчи ўринга тушиб қолган.

Reuters ёзишича, ушбу маълумотлар шундан дарак берадики, Россия, нархларни пасайтиришига тўғри келган бўлса-да, Ғарб санкцияларига қарамасдан, ўз нефти учун харидорлар топишга қодир.

Аввалроқ Россия май ойи якунлари бўйича Ҳиндистонга нефть экспорт қиладиган мамлакатлар ичида иккинчи ўринни эгаллагани хабар берилганди. Ушбу мамлакатга етказиб бериш ҳажмининг кескин ўсишини экспертлар Россия нефти чегирма билан сотилаётгани, бу эса уни ташиб келтиришга кетадиган жиддий харажатларни қоплагани билан боғлади.

АҚШ, Евроиттифоқ ва бошқа мамлакатлар февраль охиридан бошлаб Россияда ишлаб чиқарилган нефтни етказиб беришга қарши чеклов чораларини киритганди. Хусусан, июнь бошида Европа мамлакатлари Россиядан нефть сотиб олишни тақиқловчи санкциялар пакетини маъқуллади, шунингдек, нефть ва нефть маҳсулотларини денгиз орқали учинчи мамлакатларга ташишни суғурталашни тақиқлади.

Санкциялар фонида Россия харидорларга нефтни катта чегирмалар билан таклиф қилди, мартда Ural эталон навли нефтига ўртача чегирма қарийб 20 фоизни, апрелда — 33 фоизни ташкил қилди, сўнг ёнилғининг ўртача бир ойлик нархи деярли 20 фоизга ошди.