Молдова собиқ президенти Игорь Додоннинг рафиқаси Галина Додон коррупция ҳақидаги жиноий иш бўйича айбланаётгани ва унинг мамлакатдан чиқиши тақиқланганини маълум қилди, деб ёзади «Интерфакс».
У Аксилкоррупция прокуратураси прокурорлари томонидан «пакет иши» бўйича айбланувчи ва жиноий шерик деб топилган.
«Коммерсантъ» ёзишича, Галина Додон ноқонуний бойишда иштирок этганликда айбланмоқда: у турмуш ўртоғи томонидан 21 миллион леу (1 миллион евро)дан ортиқ қийматга эга мулкнинг олинишида қатнашган, бу эса декларация қилинган 3 миллион леу (150 минг евро) миқдоридаги даромаддан анча зиёддир.
«Мен ҳеч қандай айбни тан олмайман. Бу менинг турмуш ўртоғимни бадном қилиш учун ўйлаб чиқарилган иш», — деди Галина Додон журналистларга.
Адвокатлар айтишича, у 60 кун мамлакатни тарк этмаслик ҳақида тилхат ёзиб берган.
Уч кун аввал Игорь Додон рафиқасига кўчанинг қоқ ўртасида прокуратурага чақириқ қоғози топширилганига норозилик билдирганди. У ўзининг сиёсий рақиби, амалдаги президент Майя Сандуни ундан ўч олиш учун рафиқаси, фарзандлари, онаси ва яқин қариндошларига ҳужум қилишда айблади.
Май охирида Кишинёв суди Молдова собиқ президенти Игорь Додонни 30 кунга уй қамоғига ҳукм қилганди. У ватанга хиёнат, коррупция, ноқонуний бойиш ва сиёсий партиянинг жиноий ташкилот томонидан молиялаштирилишида айбланмоқда.
Додон журналистларга иш президент Майя Сандунинг буюртмасига кўра қўзғатилганини, гўёки у сайланганидан кейин дарҳол Додонни қамоққа юборишни талаб қилганини айтди. Айни пайтда унинг маълум қилишича, бўлаётган воқеалар «мухолифатнинг таъсирини кесиш мақсадида Молдовадаги АҚШ элчихонаси томонидан бошқарилмоқда».
Россияпараст сиёсатчи деб ҳисобланиладиган Игорь Додон 2020 йилда президент лавозимига сайлана олмади ва Молдованинг Евроиттифоқ билан яқинлашуви тарафдори бўлган Майя Сандуга ютқазди.
Додонга қарши иш унинг 2019 йилда молдовалик нуфузли сиёсатчи ва мамлакатдаги энг бой бизнесмен Владимир Плахотнюк билан учрашуви акс этган видеоёзувлар билан боғлиқ. Видеотасвирлардан бирида Плахотнюкнинг қўлида номаълум пакетни кўриш мумкин, уни ўша пайтда президент бўлган Додон «Костяга беришни» сўраган. Пакетда пул бўлган, деган даъволар ҳам айтилди. Додон пакет билан боғлиқ видеоёзувни Плахотнюк томонидан провокация деб атади.
Изоҳ (0)