Америкалик Кит Жонсон Илон Маск ва унинг SpaceX ва Tesla компанияларини судга берди, деб ёзади «РБК». Уни «Dogecoin молиявий пирамидаси» билан алдашган — айбдорлар ушбу криптовалюта нархини ошириш учун «рэкет» билан шуғулланади.
«Жавобгарлар аслида ҳеч қандай қийматга эга бўлмаган Dogecoin’ни қонуний инвестиция деб алдамоқда», — дейилади Жонсон Манхэттен федерал судига киритган шикоятда.
Даъвогар 86 миллиард доллар миқдорида зарар қопланишини, 172 миллиард доллар миқдорида уч карра зарарни ҳамда Маск ва унинг компанияларига Dogecoin’ни тарғиб қилишни тақиқлайдиган ва унинг савдосини қимор ўйини деб эълон қиладиган ҳужжатни талаб қилмоқда. Жонсон 2019 йил апрелидан буён Dogecoin савдоси туфайли пулларини йўқотган одамларга вакиллик қилмоқчи.
Bloomberg маълумотларига кўра, Dogecoin нархи биржада 16 июнь куни 0,05 доллар даражасида сақланиб турган, бу йил у тахминан 67 фоизга тушган. Ўтган йилнинг майида у 0,7 долларлик чўққига чиқиб, кейин пасайишни бошлаганди.
Январда Tesla компанияси аксессуарларга ушбу криптовалюта билан тўлаш имкониятини жорий қилди. Бунгача Маск Dogecoin тўловлар учун биткоиндан кўра кўпроқ тўғри келишини айтганди. Унинг сўзларига кўра, альткоин тармоғидаги транзакция биринчи криптовалюта билан операцияларга қараганда тезроқ ва арзонроқ бўлади.
Криптовалюталарни Билл Гейтс ҳам бир неча марта танқид қилганди. Хусусан, у NFT ва криптовалюталарни фирибгарлик деб атади. 14 июнь куни бўлиб ўтган иқлим конференциясида яна рақамли активларни «Каттароқ аҳмоқ» назарияси асосида танқид қилди. Назария ўзгармас токенлар каби криптовалюта лойиҳаларини рад этади.
Билл Гейтс илгари криптовалютани танқид қилиб, ўтган йили Илон Маск билан Биткоин чакана инвесторлар учун жуда хавфли эканлиги ва уни қазиб олишнинг атроф-муҳитга зарари ҳақида баҳслашган эди.
Мавзуга доир:
Изоҳ (0)