Японияда канализация қувурларини текшириш пайтида тўрт эркак вафот этди. Бу ҳақда Жапан Today хабар берди.
Полиция маълумотларига кўра, уларнинг барчаси чуқур люкка тушиб қолган — дастлаб бир ишчи унинг ичига йиқилган, қолган уч киши эса уни қутқаришга уринган.
Кенглиги тахминан 60 сантиметр, чуқурлиги 12 метр бўлган люк 1981 йилда ўрнатилган диаметри 2,6 метрлик эски канализация қувурига олиб боради. Ҳалок бўлганларнинг тўрталаси ҳам 50 ёшлар атрофидаги эркаклардир.
Фожиа жойида водород сулфид — рангсиз, аммо ўткир ҳидли, заҳарли ва ўлимга олиб келиши мумкин бўлган газ аниқланган. Ҳозирда полиция ишчиларнинг ўлимида бу газнинг роли бор-йўқлигини текширмоқда.
Объектда жами етти киши бўлиб, улар техник кўрикдан ўтказишга тайёргарлик доирасида дренаж ишларини олиб боришаётган бўлган. Ушбу текширув ҳукумат кўрсатмасига биноан 2025 йил январь ойида Ясио шаҳридаги чорраҳада улкан ўпирилиб тушган жой ҳосил бўлган воқеадан сўнг ўтказилган. Ўшанда чуқурга юк машинаси тушиб кетган бўлиб, унинг ҳайдовчиси май ойигача бедарак йўқолган деб ҳисобланиб, кейинчалик унинг жасади топилган эди.
Канализация қувурларининг занглаши натижасида юз берган ҳодиса жамоатчилик эътиборини ер ўпирилишига жалб қилган ва ҳукуматни эскираётган инфратузилма муаммосини ҳал этиш чораларини кўришга ундаган.
Ҳукумат март ойида бошлаган текширув бутун мамлакат бўйлаб камида 30 йил аввал ўрнатилган, диаметри 2 метр ва ундан катта бўлган канализация қувурларига қаратилган.
Изоҳ (0)