Жаҳон соғлиқни сақлаш ташкилотининг (ЖССТ) Европа бўйича минтақавий директори Ханс Генри Клюгенинг айтишича, дунё аҳолисининг учдан бир қисми ҳалигача коронавирусга қарши вакцинанинг бир дозасини ҳам олмаган.
«Бугун, COVID-19 га қарши эмлаш бошланганидан 1,5 йил ўтиб ҳам, дунё аҳолисининг 33 фоизи ҳануз вакцинанинг бирорта дозасини олмаган», — деди Клюге Санкт-Петербургдаги халқаро иқтисодий форумда.
Бир ярим йил аввал 190 та давлат вакциналарнинг дунёда тенг тақсимланишига эришиш учун ЖССТ ҳомийлигидаги COVAX дастурига қўшилганди. Дастур ғояси ажойиб эди, лекин иш бермади — камбағал ва бой мамлакатлар ўртасидаги вакцина тенгсизлиги билан боғлиқ вазият деярли ўзгаришсиз қолди.
Энг қашшоқ мамлакатларни вакцина билан таъминлашдаги тенгсизликлар узоқ муддатли ижтимоий-иқтисодий оқибатларга олиб келиши мумкин, дея қайд этади Wired нашри. Масалан, эмлаш даражасининг пастлиги ва бунинг натижасида давомли локдаунлар болаларнинг узоқ вақт мактабдан қолишига олиб келади, бу эса уларни мажбурий меҳнатга жалб этилиши хавфини оширади. Паст ва ўрта даромадли мамлакатларнинг соғлиқни сақлаш тизимидаги ортиқча юк эса оналар ўлимини қарийб 40 фоизга оширган.
Изоҳ (0)