Франция президенти Эммануэль Макрон россиялик ҳамкасби Владимир Путин томонидан муайян ҳаракатлар амалга оширилган тақдирдагина Россия ташриф буюришини маълум қилди, деб ёзади «РБК». Бу ҳақда у TF1 телеканалига берган интервьюсида айтиб ўтди.
«Украинага ташрифдан кейинги қадам Россияга сафар бўладими?» — деган саволга Макрон шундай жавоб берди: «Бу дастлабки шартларни, президент Путин томонидан маълум бир ҳаракатларни кўзда тутади».
Франция етакчиси Германия канцлери Олаф Шольц, Италия бош вазири Марио Драги ва Руминия президенти Клаус Йоханнис билан бирга 16 июнь, пайшанба куни Киевга ташриф буюрганди.
Украина президенти Владимир Зеленский билан муносабатлари ҳақида гапирар экан, Франция етакчиси улар «совимаган»ини айтди. Унинг сўзларига кўра, агар у Путин билан алоқаларни сақлаб турган бўлса ҳам, бу мулоқотлар украиналик ҳамкасбидан яшриинча бўлмаган ва «баъзан ҳатто унинг илтимосига кўра бўлган».
Сўнгги марта Макрон Россияга 7 февраль куни келган эди. Россиялик ҳамкасби билан музокаралардан кейин Франция президенти, хусусан, уларнинг учрашуви Украина атрофидаги вазиятнинг янада кучайиши олдини олишда ёрдам берганини айтганди. «Мақсадга эришилди», — деганди у ўшанда.
Украинада Россия ҳарбий операцияси бошланганидан кейин Путин ва Макрон бир неча марта телефон орқали суҳбатлашди. Чунончи, етакчилар 24 февраль, ҳарбий ҳаракатлар бошланган куни гаплашган, март ойида эса деярли ҳар ҳафта қўнғироқлашган. Май ойида икки марта мулоқот ўтказилган, охиргиси 28-санада бўлган.
Июнь ойи бошида Франция президенти 2021 йил декабридан буён Путин билан «суҳбатлар ҳисобини унутиб қўйгани»ни, у билан «юзлаб соат» гаплашганини айтди. Макрон Ғарбни «ўз халқи, ўзи ва тарих учун тарихий ва жиддий хатолик»ка йўл қўйган Россияни ерга урмасликка чақирганди, унинг сўзларига кўра, бу ҳақда у россиялик ҳамкасбига гапирган.
Изоҳ (0)