Қорақалпоғистон Республикаси Тўрткўл тумани ҳудудидан ўтган автомагистрал йўлида ҳаракатланаётган автобусда ёнғин содир бўлди, деб хабар беради ФВВ матбуот хизмати.
Маълум қилинишича, 8 июнь куни соат 03:14 да Тўрткўл тумани «Оқ қамиш» ОФЙ ҳудудидан ўтган А-380 автомагистрал йўлининг 555 километрида Тошкентдан Нукус шаҳрига ҳаракатланиб келаётган Yutong русумли йўловчи ташувчи автобусда ёнғин содир бўлаётгани тўғрисида туман ФВБга хабар келиб тушган. Таъкидланишича, автобус салонида 55 нафар йўловчи ва 2 нафар ҳайдовчи бўлган.
Шунга кўра 2 та ёнғин-қутқарув экипажи соат 03:40 да воқеа жойига етиб бориб, ёнғин соат 04:15 да бартараф этилган.
Ёнғин натижасида автобус тўлиқ ёниб зарарланган. Ёнғин электр симларининг қисқа туташуви натижасида содир бўлгани тахмин қилинмоқда.
«Ҳодиса оқибатида тан жароҳати олганлар ва ҳалок бўлганлар йўқ. Маълумот учун, энг яқин ёнғин ўчириш қисмидан ёнғин рўй берган манзилгача бўлган масофа тахминан 45 километрни ташкил этади», — дейилади хабарда.
Аввалроқ Тошкент вилоятида Isuzu автобуси ёниб кетгани тўғрисида хабар берилганди.
Изоҳ (0)