Qoraqalpog‘iston Respublikasi To‘rtko‘l tumani hududidan o‘tgan avtomagistral yo‘lida harakatlanayotgan avtobusda yong‘in sodir bo‘ldi, deb xabar beradi FVV matbuot xizmati.
Ma’lum qilinishicha, 8-iyun kuni soat 03:14 da To‘rtko‘l tumani “Oq qamish” OFY hududidan o‘tgan A-380 avtomagistral yo‘lining 555 kilometrida Toshkentdan Nukus shahriga harakatlanib kelayotgan Yutong rusumli yo‘lovchi tashuvchi avtobusda yong‘in sodir bo‘layotgani to‘g‘risida tuman FVBga xabar kelib tushgan. Ta’kidlanishicha, avtobus salonida 55 nafar yo‘lovchi va 2 nafar haydovchi bo‘lgan.
Shunga ko‘ra 2 ta yong‘in-qutqaruv ekipaji soat 03:40 da voqea joyiga yetib borib, yong‘in soat 04:15 da bartaraf etilgan.
Yong‘in natijasida avtobus to‘liq yonib zararlangan. Yong‘in elektr simlarining qisqa tutashuvi natijasida sodir bo‘lgani taxmin qilinmoqda.
“Hodisa oqibatida tan jarohati olganlar va halok bo‘lganlar yo‘q. Ma’lumot uchun, eng yaqin yong‘in o‘chirish qismidan yong‘in ro‘y bergan manzilgacha bo‘lgan masofa taxminan 45 kilometrni tashkil etadi”, — deyiladi xabarda.
Avvalroq Toshkent viloyatida Isuzu avtobusi yonib ketgani to‘g‘risida xabar berilgandi.
Izoh (0)