Умумтаълим мактабларининг 1-синфига қабул жараёнлари 20 июндан бошланади. Бу ҳақда Халқ таълими вазирлиги матбуот хизмати хабар берди.
Мактабларга бириктирилган микроҳудуд бўйича қабул жараёнлари 2022 йилнинг 20 июнидан 31 июлига қадар амалга оширилади.
Умумтаълим мактабларининг ўқувчи ўрни, малакали педагог кадрлар билан таъминлангани, синф хоналарининг ўқув мебеллари билан жиҳозланганидан келиб чиқиб, умумтаълим мактабларининг бўш ўринларига микроҳудуддан ташқари қўшимча қабул жараёнлари 2022 йилнинг 1—15 август кунлари амалга оширилади.
Шунингдек, ота-оналарга қулайлик яратиш мақсадида Тошкент шаҳри, Қорақалпоғистон Республикаси ва вилоятларнинг марказидаги умумтаълим мактабларида 1-синфга қабул жараёнлари электрон шаклда амалга оширилади.
«Амалдаги қонун ҳужжатларига мувофиқ, умумтаълим мактабларининг 1-синфига болалар 7 ёшга тўладиган йилда қабул қилинади. Яъни янги 2022/2023-ўқув йилида 2015 йилнинг 1 январидан 31 декабрига қадар туғилган болалар 1-синфга қабул қилинади. Қабул жараёнлари ҳақида қўшимча маълумот олиш учун мактаб маъмуриятига мурожаат қилишингиз мумкин», — дейилади хабарда.
Аввалроқ «Халқ таълими тизимида давлат хизматларини кўрсатишни янада такомиллаштириш тўғрисида»ги ҳукумат қарори қабул қилинганди. Унга кўра, ҳар йили 1 майгача ўқувчиларни 1-синфга қабул қилиш ва бир мактаб (синф)дан бошқасига ўтказиш бўйича давлат хизматлари кўрсатиладиган ҳудудлар рўйхати тасдиқланиш ва Халқ таълими вазирлиги расмий веб-сайтида эълон қилиш белгиланган.
Изоҳ (0)