Ижтимоий тармоқларда Урганчда 8 нафар шахс Cobalt ҳайдовчисини пичоқлаб кетгани ва жабрланувчи воқеа жойида вафот этгани ҳақида видеоёзув тарқалди. Бош прокуратура матбуот котиби ҳолат юзасидан маълумот берди.
Маълум қилинишича, видеоёзувда акс этилган ҳолат бўйича 2 июнь куни жиноят иши қўзғатилиб, ҳозирда Хоразм вилояти прокуратураси томонидан тергов ҳаракатлари олиб борилмоқда.
Жиноят иши доирасида бир нафар шахсга Жиноят кодексининг 97-моддаси (қасддан одам ўлдириш) билан айб эълон қилиниб, «қамоққа олиш» эҳтиёт чораси қўлланилган.
Қолган 7 нафар шахсга Жиноят кодексининг 277-моддаси (безорилик) билан айб эълон қилиниб, бир нафарига «қамоққа олиш» ва 6 нафарига «муносиб хулқ-атворда бўлиш тўғрисида тилхат» эҳтиёт чоралари қўлланилган. Тергов давом этмоқда.
Бундан олдин, Андижонда отасини ҳақоратлаган қўшнисини пичоқлаб ўлдирган эркак ушлангани, Тошкент вилоятидаги новвойхоналардан бирида 34 ёшли эркак танишини пичоқлагани, Тошкентда севган қизини пичоқлаб, уни тинч қўйишини айтган йигитни ўлдирган эркак 15 йилга қамалгани тўғрисида хабар берилганди.
Изоҳ (0)