Тошкент шаҳрида Nexia-3 ва автобус иштирокида содир бўлган йўл-транспорт ҳодисаси оқибатида бир киши ҳалок бўлди. Бу ҳақда «Тошшаҳартрансхизмат» матбуот хизмати хабар берди.
Маълум қилинишича, 3 июнь куни соат 16:27 да Nexia-3 машинаси ҳайдовчиси У.О. автомобилни кичик ҳалқа автомобиль йўли бўйлаб Бунёдкор шоҳкўчаси томонга бошқариб бораётган бўлган. Ҳайдовчи белгиланган йўл ҳаракати қоидаларига риоя қилмасдан, ўзидан олдинда ҳаракатланиб кетаётган транспорт воситаси билан оралиқ масофа сақламаган ва машина катта тезликда ҳаракатлангани сабабли олдидаги пиёдаларни ўтказиш учун тўхтаган MAN русумли автобуснинг орқасига келиб урилган.
Авария оқибатида енгил автомобиль ҳайдовчиси Республика шошилинч тез ёрдам илмий марказида вафот этган.
Ҳозирда мазкур йўл-транспорт ҳодисаси бўйича Тошкент шаҳар ИИББ томонидан дастлабки тергов ишлари олиб борилмоқда. «Тошшаҳартрансхизмат» Ҳаракат хавфсизлигини назорат этиш бўлими томонидан хизмат суриштируви ўтказилади.
Бундан олдин Қибрайда икки йўловчи автобус пойга ўйнаши оқибатида улардан бири Lacetti билан тўқнашиб кетгани, Тошкентда Lacetti қайрилиб олишга уринган Mercedes-Benz автобусига келиб урилгани тўғрисида хабар берилганди.
Изоҳ (0)