Бугун,

  • USD 10940.05
  • RUB 182.26
  • EUR 11121.65

Қирғизистон Вазирлар Маҳкамаси шакар экспортига вақтинчалик тақиқ жорий қилди, деб ёзади «Интерфакс» идора матбуот хизматига таяниб.

Фото: «Дарё»

Фото: «Дарё»

«Қирғизистон Вазирлар Маҳкамаси мамлакат ҳудудидан шакар ва шакарқамиш хом ашёси олиб чиқилишига олти ой муддатга вақтинчалик тақиқ киритмоқда», — дейилади хабарда.

Матбуот хизмати маълумотларига кўра, қарор Қирғизистон ҳудудидан шакарнинг ялпи олиб чиқиб кетилиши имкониятини истисно қилиш, мамлакатнинг озиқ-овқат хавфсизлигини таъминлаш ва бозорда нархларни ушлаб туриш мақсадларида ишлаб чиқилган.

Аввалроқ шакар нархи асоссиз ўсишига йўл қўймаслик учун Қирғизистон монополияга қарши курашиш хизмати республиканинг барча вилоятларида мониторинг ўтказганди. Таҳлил мамлакатда шакар танқислиги йўқлигини, бироқ унинг нархлари ошишни бошлаганини кўрсатди.

Мамлакат Миллий статистика қўмитаси маълумотларига кўра, май бошидан буён Қирғизистонда шакар 10 фоизга қимматлашган. 2 май ҳолатига шакарнинг ўртача нархи 86,38 сом (1,04 доллар)ни ташкил этган бўлса, 30 май куни у 95,38 сом (1,14 доллар)га етган.

Қозоғистонда эса шакар нархи бир йил ичида 60,5 фоизга ошгани маълум қилинди. Таъкидлаш жоиз, қозоғистонликлар дўконлар пештахталарида шакар йўқлигидан оммавий шикоят қилмоқда. Танқислик сўнгги бир ҳафтадан буён, айниқса, кучли сезилмоқда. Шакарнинг нархи ҳам жуда ошиб кетгани айтилмоқда.

Изоҳ
Асосий янгиликлар