Туркия президенти Ражаб Тоййиб Эрдўғон Сурия шимолида янги аксилтеррор операцияси бошланганини маълум қилди. Унга кўра, Туркия билан чегарадан 30 километр ичкарида «хавфсизлик зонаси»ни шакллантириш бошланмоқда.
«Биз Талл-Рифат ва Манбижни (Сурия шимолидаги шаҳарлар — таҳр.) террорчилардан тозалаяпмиз», — деди Эрдўғон ҳукмрон Адолат ва тараққиёт партиясининг парламентдаги фракцияси йиғилишида.
Туркия президентининг қўшимча қилишича, кейинчалик Туркия билан чегарадош бошқа ҳудудларни ҳам террорчилардан тозалаш режалаштирилган. У аксилтеррор операцияси иштирокчилари сони ва бошқа тафсилотларни айтмади. Эрдўғон, шунингдек, АҚШ ва Россия Туркия учун хавфсизлик зонаси яратиш бўйича ўз мажбуриятларини бажармаганини иддао қилди.
Ўз навбатида, АҚШ Туркия ҳарбийларининг Суриядаги амалиётига қаршилигини билдирди. АҚШ Давлат котиби Энтони Блинкеннинг айтишича, Сурия шимолидаги ҳар қандай янги ҳужум минтақадаги барқарорликка путур етказади.
«Сурия шимолидаги ҳар қандай кескинлашувга келсак, биз бунга қаршимиз ва ўт очишни тўхтатишни қўллаб-қувватлаймиз. Биз янги ҳужумчи кучлар минтақадаги барқарорликка путур етказиши ва ундан ўз мақсадлари учун фойдаланиши мумкинлигидан хавотирдамиз», — деди Блинкен НАТО Бош котиби Йенс Столтенберг билан қўшма матбуот анжуманида.
Ўтган ҳафта Ражаб Тоййиб Эрдўғон жанубий чегаралар бўйлаб 30 километрлик хавфсизлик зонасини яратиш бўйича ишларни якунлаш режасини эълон қилганди. Унинг таъкидлашича, Курдистон Ишчилар партияси билан алоқалари учун Анқара томонидан террорчи ташкилотлар рўйхатига киритилган Сурия Курдистони халқ ҳимояси бўлинмалари «Туркия ва Суриянинг тинч аҳолисига ҳужум қилишда давом этмоқда». Сурия Туркияни этник аҳолини «тозалаш»да айблади. Туркия, шунингдек, Ироқ шимолидаги курд тузилмаларига қарши операция ўтказмоқда.
Изоҳ (0)