АҚШ халқаро қоидаларни ҳаммадан ҳам кўпроқ бузади ва бунда бошқаларни айблашга ҳақи йўқ. Бу ҳақда Хитой халқ республикаси Ташқи ишлар вазирлиги расмий вакили Чжао Лицзян 30 май, душанба кунги брифингда айтиб ўтди.
«АҚШ қоидалар ҳақида гапиришга ҳеч қандай ҳақи йўқ. Вашингтоннинг фикрича, халқаро қоидалар доим АҚШ манфаатлари ва гегемонлиги йўлида хизмат қилиши керак… Мен АҚШдан бир нечта саволларга жавоб беришни сўраган бўлардим: АҚШ ўз хоҳишига кўра суверен мамлакатларга қарши уруш бошлаганида ва рангли инқилобларни қўзғатганида қоидалар нималардан иборат бўлади?» — деди дипломат.
АҚШни инсон ҳуқуқлари умуман ташвишлантирмайди, у Хитойга мунтазам равишда туҳмат қилиш, уни ёмон отлиқ қилиш, тийиб туриш ва унга босим ўтказиш учун баҳона сифатида ундан фойдаланади, деди Чжао Лицзян.
Аввалроқ АҚШ давлат котиби Энтони Блинкен мамлакат Хитойнинг БМТнинг инсон ҳуқуқлари бўйича олий комиссари Мишел Бачелетнинг Хитойга ташрифини манипуляция қилишга уринишларидан ҳамда ташриф чоғидаги шароитлар ХХРда инсон ҳуқуқлари билан боғлиқ вазиятни тўлиқ баҳолаш имконини бермаганидан хавотирда эканини маълум қилганди.
Аслида эса, деди Чжао Лицзян, олий комиссар Бачелетнинг Хитойга ташрифини ташкиллаштириш унинг ўз хоҳишларига мувофиқ ва иккала томоннинг ҳар томонлама маслаҳатлашувлари асосида амалга оширилган. Бачелетнинг ўзи матбуот анжуманида унинг одамлар билан мулоқотлари ва ҳамкорликлари маҳаллий ҳукумат томонидан назоратсиз амалга оширилганини айтганди, деди дипломат.
АҚШ ҳар йили ХХРни диний эркинликларни бузувчи мамлакатлар рўйхатига киритади. Пекин айбловларни рад этади ва АҚШни иккиюзламачиликда айблайди. АҚШ Давлат департаменти дунёда инсон ҳуқуқлари билан боғлиқ вазият ҳақидаги маърузасида даъво қилишича, Хитой ҳукумати 2021 йилда Шинжон-Уйғур мухтор туманида этник ва диний озчиликларга нисбатан геноцидни амалга оширган ва инсониятга қарши жиноятларга қўл урган.
Изоҳ (0)