Украинада 24 февраль куни уруш бошланганидан буён 4074 нафар тинч аҳоли ҳалок бўлди, 4826 нафари яраланди. Бу ҳақда БМТ Инсон ҳуқуқлари бўйича Олий комиссари бошқармасининг янгиланган маълумотларида айтилган. Қурбонлар орасида 262 нафар бола бор.
Донецк ва Луганск вилоятларида 2307 нафар тинч аҳоли ҳалок бўлган, яна 2730 нафари яраланган. Шулардан вилоятларнинг ДХР ва ЛХР назоратидаги ҳудудларида 136 киши ҳалок бўлган, 569 киши жароҳатланган. Украина ҳукумати назоратидаги ҳудудларида эса 2171 киши ҳалок бўлган ва 2161 киши яраланган.
Украинанинг бошқа ҳудудларида уруш қурбонлари 1767 кишини, турли даражада жароҳат олганлар 2096 кишини ташкил қилмоқда.
«Тинч аҳоли орасида маълум бўлган ўлимларнинг аксарияти кенг кўламли вайронагарчиликларга сабаб бўлган портловчи қуроллардан фойдаланиш, жумладан, оғир артиллерия ва баравар ўт очиш тизимларидан ўққа тутишлар, ракета ва авиазарбалар оқибатида содир бўлган», — дейилади хабарда.
БМТ Олий комиссари бошқармаси тинч аҳоли орасидаги йўқотишлар аслида бундан кўпроқ, деб ҳисоблайди, чунки жанглар давом этаётган ҳудудлардан маълумот олиш қийин. Ҳисоботга киритилмаган баъзи маълумотлар ҳали тасдиқланишини кутмоқда.
БМТ томонидан тақдим этилган рақамлар ҳарбийлар орасидаги қурбонларни ўз ичига олмайди. Украина президенти Владимир Зеленский 16 апрель куни уруш давомида кўрилган ҳарбий йўқотишлар 2,5 мингдан 3 минг кишигача эканини, яна 10 минг киши жароҳатланганини айтган эди. Россия Мудофаа вазирлиги ўша санада Украина томонининг йўқотишларини 23 367 кишига баҳолаган.
Россия Мудофаа вазирлиги ҳарбийлар орасидаги талафотлар ҳақида охирги марта 25 март куни хабар берган. Ўша пайтда эълон қилинган маълумотларга кўра, Украинадаги жанговар ҳаракатларда 1351 нафар россиялик ҳарбий ҳалок бўлган, 3825 нафари яраланган.
Изоҳ (0)