Молдова собиқ президенти Игорь Додон бир нечта моддалар, шу жумладан, давлатга хиёнат бўйича очилган жиноят иши доирасида 72 соатга ҳибсга олинди, деб ёзади «РБК».
«Десчиде.мд» нашри манбаларига кўра, собиқ президент билан бирга унинг қайноғаси Петру Мариняну ҳам қўлга олинган. У далилларни йўқ қилишга уринган.
Шу пайтгача Додоннинг уйида тинтув ўтказилаётган эди. Суриштирув тўртта модда бўйича жиноият иши доирасида олиб борилмоқда, булар — пассив коррупция, сиёсий партиянинг жиноий ташкилотдан молиявий ёрдам олиши, ноқонуний бойиш ва давлатга хиёнат.
«Тергов тадбирлари давом этмоқда. Додоннинг уйида ва унга тегишли баъзи иншоотларда тинтувлар ўтказилди. У 72 соатга ҳибсга олинди», — дея маълум қилди Молдова Бош прокуратураси матбуот котиби Марианна Кёрпак.
Унинг аниқлик киритишича, тинтувлар жами 12 та жойда, шу жумладан, собиқ президент ўзи тузиб, раҳбарлик қилган Молдова—Россия ишбилармонлик иттифоқи офисида ҳам олиб борилган. Шунингдек, полиция сиёсатчининг воситачиларига тааллуқли кўчмас мулкларни ҳам ўрганмоқда.
Додон фахрий президенти ҳисобланадиган Социалистлар партияси Молдова ҳукуматини мамлакатни бошқаришда натижаларга эришишга ноқобил бўлгани туфайли «томоша уюштириш»га уринишда айблади.
Социалистлар партияси собиқ етакчиси Игорь Додон 2016—2020 йилларда Молдова президенти бўлган. У россияпараст сиёсатчи ва Владимир Путиннинг тарафдори ҳисобланади. 2020 йилги сайловда у Майя Сандуга мағлуб бўлди.
18 май куни Молдовада мамлакат собиқ президенти ва Социалистик партиянинг собиқ раҳбари Игорь Додонга нисбатан унинг Молдова Демократик партияси собиқ раҳбари Владимир Плахотнюк билан учрашуви акс этган видеотасвир ортидан жиноий иш очилган эди.
Ушбу видео Молдова парламентининг собиқ депутати Юри Ренита томонидан 2020 йилда эълон қилинган. Унда Плахотнюк ва ўринбосари Сергей Яралов Додонга пакет топширади. Ренитанинг таъкидлашича, учрашув 2019 йилда бўлиб ўтган, пакетда катта миқдордаги пул бор бўлган.
Видеода Додон ва Плахотнюк парламентда конституциявий кўпчиликка эга бўладиган коалиция тузишни муҳокама қилади. ТВ-8 канали таъкидлашича, Додон «доимий равишда Владимир Путинга қайдлар ёзиб туришини» айтган, аммо уларнинг мазмунига ойдинлик киритмаган.
2020 йил июнь ойида Молдованинг Коррупцияга қарши прокуратураси «жиноят белгиларини» кўрмагани сабаб Додонга қарши иш қўзғатишдан бош тортган эди. Идоранинг тушунтиришича, текширув пакетнинг ичида нима бўлганини аниқлай олмаган, қарор эса қонуний йўл билан тўпланган далилларга асосланган.
Додон Плахотнюкдан пул олганини рад этиб, жиноий иш қўзғатилишини унинг «мамлакатдан қочиб кетиши»га эришиш истаги ва «ҳамма нарса издан чиққан бир пайтда» Молдовадаги муаммолардан эътиборни чалғитишга уриниш билан изоҳлади.
2021 йил декабрида собиқ президент 2008 йилда Молдовани электр энергияси билан таъминлайдиган Energocom иштирокидаги схема ҳамда Иқтисодиёт вазирлиги (ўша вақтда унга Додон раҳбарлик қилган) ёрдамида 12 миллион доллар миқдоридаги ўғирликлар ҳақидаги иш бўйича гумонланувчи деб топилган эди.
Изоҳ (0)