Зеленский тўсатдан вафот этган тақдирда, Украина ҳукуматида Б режа борлигини айтди

Украина ҳукуматида мамлакат раҳбариятидан бирортаси, жумладан, давлат раҳбари ўлдирилган тақдирда «Б режа бор», деди президент Владимир Зеленский Швейцариянинг Давос шаҳридаги Украина уйига йиғилганларга видео форматда сўзлаган нутқида.

Зеленскийнинг сўзларига кўра, расмийлар воқеалар ривожи шундай кечган тақдирда, чора кўришга тайёр: «Бизнинг қонунчилигимизга кўра, давлатни бошқарадиган одам бўлади. Биз тайёргарлик кўриб қўйганмиз ва бўлинганмиз — мен, бош вазир ва парламент раҳбари».

Зеленский Украина парламентли президентлик республикаси эканини эслатди. «Агар у ёки бу тарзда йўқотиш бўлса, биз бу жараёнга тайёр бўлишимиз кераклигини билардик. Вазирлар Маҳкамасини икки қисмга бўлдик, бу эса мамлакатнинг ҳатто бундай оқибатларда ҳам ҳимоясиз қолмаслиги учун иккита дубль бўлди», — деди у.

Украина президенти унинг ҳаётига таҳдид давом этаётганини тан олди. «Аммо мен тирикман ва бу голограмма эмас, сиз билан чинакамига гаплашиб турибман», — деб ҳазиллашди у.

Апрель ойи бошида Украина президенти офиси вакиллари Россия босқинининг бошидан бери Владимир Зеленскийга ўндан ортиқ суиқасд уюштирилганини айтишган эди. «Соқчиларимиз бу масалалар билан шуғулланмоқда ва бу ерга ов учун келган муаммоли унсурларни йўқ қилмоқда», — деган Зеленскийнинг ўзи суиқасдга уринишлар ҳақида Россия ОАВларига берган интервьюсида. Россия президентининг матбуот котиби Дмитрий Песков француз телеканалига берган интервьюсида, Россия Зеленскийни ўлдиришни режалаштирганми, деган саволга «ундай эмас» деб жавоб берди.