Анқара «Украинадаги вазиятни тартибга солиш ҳақидаги шоу»да қатнашиш ўрнига Киевга амалий ёрдам кўрсатди, деган Туркия президенти Ражаб Тоййиб Эрдўғон. Унинг сўзларига кўра, Туркия бир вақтнинг ўзида Россия билан муносабатларни ҳам ривожлантирмоқда.
«Биз Украинадаги инқирозни ҳал эта олмаган шоуда қатнашиш ўрнига, ўт очишга барҳам бериш ва тинчлик ўрнатиш борасида амалий ёрдам беришга интилдик», — деган Туркия президенти ҳукумат мажлисида («ТАСС» иқтибоси).
«Анқара Киевга жиддий, аниқ ва фойдали ёрдам берган, Россияга ҳам бу борадаги позициямизни қўрқмай баён этганмиз», — дея қайд этган у.
Россия Украинада махсус ҳарбий операцияни бошлаганидан бери Туркия Москва ҳамда Киев ўртасидаги урушга барҳам бериш учун воситачилик қилишга уринмоқда. Туркия президенти бир неча марта Украина ва Россия давлат раҳбарлари Владимир Зеленский ҳамда Владимир Путин учрашувини ташкиллаштиришга интилган.
11 апрелда Эрдўғон Туркиянинг Россия ва Украина низосини тўхтатиш учун барча шарт-шароитларни ҳозирлашга тайёрлиги, икки давлат ўзаро низони музокаралар билан ҳал этиши кераклигини таъкидлаган. 30 апрелда Туркия давлат раҳбари Анқаранинг БМТ бошчилигидаги гуруҳ билан биргаликда Украинага гуманитар ёрдам тақдим қилишга тайёрлигини айтган.
Изоҳ (0)