Россия уруши томонидан вайрон қилинган инфратузилмани қайта тиклаш учун Украинага 500 дан 600 миллиард еврогача керак бўлади. Бу ҳақда Европа комиссияси вице-президенти Валдис Домбровскис маълум қилди, деб ёзади Politico.
Марокашда нутқ сўзлаётиб, Домбровскис қайта тиклаш «халқаро ҳамжамиятнинг мувофиқликда ҳаракат қилишини талаб этиши ва Европа иттифоқи томонидан бу мувофиқлаштиришни амалга оширишга тайёрлиги»ни маълум қилди.
Шунингдек, у Евроиттифоқ реконструкция учун зарур бўлган ушбу эҳтиёжларни қўллаб-қувватлашини айтди.
Домбровскис қайд этишича, шу ой сал кейинроқ «инфратузилмани қайта тиклаш бўйича ушбу кўмакни Евроиттифоққа қўшилиш учун номзод мамлакат сифатида Украинага зарур бўладиган тузилмавий ислоҳотлар билан боғловчи» таклиф пайдо бўлади.
Евроиттифоқ Украина учун бирдамлик траст фондини яратиш устида ишламоқда. Бу Евроиттифоқнинг расмий вакили реконструкция кўламини баҳолаши билан боғлиқ биринчи ҳолатдир. Аммо ушбу рақам уруш давом этавергани сари ўзгариши мумкин.
Евроиттифоқ расмий шахслари Брюсселни Украинанинг Евроиттифоққа қўшилиши бўйича саъй-ҳаракатлар доирасида жанговар ҳаракатлар тугаганидан кейин Украинага ёрдам кўрсатишда етакчи ролини ўзига олишга чақирмоқда.
Ушбу саъй-ҳаракатларни қандай молиялаштириш бўйича турли ғоялар бор, улар орасида Россиянинг музлатиб қўйилган активларини мусодара қилиш, Россияни тинч йўл билан тартибга солиш доирасида тўлашга мажбурлаш ёки халқаро донорлардан пул йўналтириш усуллари бор.
Изоҳ (0)