Бирлашган Миллатлар Ташкилотининг Инсон ҳуқуқлари бўйича Олий комиссари бошқармаси маълумотларига кўра, Россиянинг Украинага босқини бошланганидан буён 3541 нафар тинч аҳоли ҳалок бўлган, 3785 нафари яраланган.
Қурбонларнинг 3302 нафари катталар, 239 нафари вояга етмаганларни ташкил этмоқда, жароҳатланганлар орасида эса 355 нафар вояга етмаганлар бор.
Қурбонлар ва ярадорларнинг энг кўпи — мос равишда 1897 ва 1949 киши Донецк ва Луганск вилоятларига тўғри келади.
Халқаро миграция ташкилоти маълумотларига кўра, 8 миллиондан ортиқ украиналик ўз уйини ташлаб, мамлакатнинг бошқа ҳудудларига кўчиб ўтишга мажбур бўлган.
БМТ 3 май куни Украинада уруш бошидан буён ҳалок бўлган тинч аҳоли сони 3153 нафарга етгани, 9 май куни эса 3381 нафарга етгани ҳақида маълумотлар берганди.
Россия 24 февраль куни Украинада «махсус ҳарбий операция» бошлади. Россия президенти Владимир Путин ўз мақсадларини «саккиз йил давомида Киев режими томонидан зўравонлик, геноцидга учраган одамларни ҳимоя қилиш», шунингдек, қўшни давлатни «демилитаризация ва денасификация қилиш» билан изоҳлади.
Россия Мудофаа вазирлиги Россия ҳарбийлари фақат ҳарбий нишонларга зарба бераётганини бир неча бор таъкидлаган. Аммо энг кўп тинч аҳолининг ҳалок бўлиши Россия қўшинлар ишғол қилган ҳудудларда кузатилмоқда.
Изоҳ (0)