Буюк Британия қироличаси Елизавета II 10 май куни бўлиб ўтадиган парламент сессиясининг анъанавий очилиш маросимида иштирок этмайди, деб маълум қилди Букингем саройи. Унинг ўрнига тантанали нутқни ўғли шаҳзода Чарльз ўқийди.
BBC News хабарига кўра, 21 апрель куни 96 ёшга тўлган қиролича сўнгги дақиқаларгача Вестминстердаги маросимда иштирок этишни хоҳлаган, бироқ «ҳаракатланишдаги кичик муаммолари» туфайли охир-оқибат бундан воз кечишга мажбур бўлган.
2022 йилда Елизавета II Виндзор қасридан ташқаридаги фақат битта оммавий тадбирда — Вестминстер аббатлигида марҳум турмуш ўртоғи шаҳзода Филиппни хотирлаш маросимида қатнашди.
Қиролича Елизавета II 70 йиллик ҳукмронлиги мобайнида йиллик тантанали нутқини атиги икки марта — 1959 ва 1963 йилларда ўтказиб юборган. Ўшанда икки сафарда ҳам унинг ҳомиладорлик вақти бўлган.
Елизавета II нинг Буюк Британия қироллиги тахтига ўтирганига 70 йил тўлиши муносабати билан асосий тантаналар июнь ойида бўлиб ўтади, уларда қироличанинг иштироки қандай бўлиши ҳақида ҳозирча маълумотлар мавжуд эмас.
Изоҳ (0)