Франция президенти Эммануэль Макрон Европа Иттифоқига хос қадриятларга эга бўлган, лекин унинг таркибига кирмаган давлатлар учун Европа давлатлари ўртасида ҳамкорликнинг янги форматини яратишни таклиф қилди.
Хусусан, Франция раҳбари Украинанинг ЕИга қўшилиш жараёни бир неча йил, ҳатто ўнлаб йиллар давом этиши мумкинлигини таъкидлади.
«Биз ҳаммамиз яхши биламизки, Европа Иттифоқига киришга рухсат бериш жараёни бир неча йил ва ҳатто ўнлаб йиллар давом этади. Агар Иттифоққа кириш стандартларини пасайтиришга қарор қилмасак, албатта», — деди Макрон Страсбургдаги Европа парламентида сўзлаган нутқида.
Шунингдек, у Украинадаги можарони тинч йўл билан ҳал этиш Россияни камситиш орқали амалга оширилмаслиги кераклигини таъкидлади.
«Эртага биз тинчлик ўрнатишимиз керак. Буни унутмаслик лозим. Бу эса Украина ва Россия иштирокидаги музокаралар столида бўлиши зарур. Мазкур муҳокамаларнинг шартларини улар белгилайди. Аммо бу жараён инкор қилиш, бир-бирини истисно қилиш ва айниқса камситиш билан амалга оширилмайди», — деди Макрон.
Макроннинг таклифида кўзда тутилган форматда Европа Иттифоқига аъзоликни қўллаб-қувватловчилар ҳам, ундан чиқиб кетган давлатлар, масалан, Буюк Британия ҳам «Европа сиёсий ҳамжамияти» деб аталадиган ташкилотнинг бир қисмига айланиши мумкин.
Март ойида Макрон ЕИга аъзоликни олиш тартибини жанговар ҳаракатлар олиб борилаётган давлатга очиб бўлмаслигини таъкидлаган эди. 8 апрель куни Европа Комиссияси раҳбари Урсула фон дер Ляйен Киевга ташрифи чоғида Украина президенти Владимир Зеленскийга Европа Иттифоқига кириш сўровномасини берган, ўн кундан сўнг эса Зеленский тўлдирилган сўровномани ЕИнинг Украинадаги делегацияси раҳбари Матти Маасикасга топширган.
9 май куни Зеленский Киев Украинага ЕИ аъзолигига номзод давлат мақомини олиш учун анкетанинг иккинчи ва якуний қисмини тўлдириб бўлганини маълум қилган.
Изоҳ (0)