Тошкентда деворларга гиёҳванд моддалар савдоси билан шуғулланувчи сайт манзилини чизиб кетиш билан шуғулланган икки ўсмир қўлга олинди. Бу ҳақда ИИВ ахборот хизмати хабар берди.
Йигитларга шу каби қолдирган ҳар бир ёзуви учун 1 доллардан тўлашган. Пуллар электрон ҳамёнга ўтказиб берилган.
«Менга Telegram’дан ёзишиб, иш таклиф қилишди — деворларга реклама қолдириш. Ҳар бир ёзув учун 1 доллардан тўлашни ваъда қилишди. Мен рози бўлдим. Менга матнни юборишди ва уни чоп этиб, ҳарфларни қирқиб олишимни айтишди. Айтганидек қилдим. Шундан сўнг иккита идишда бўёқ сотиб олдим. Биринчи куннинг ўзида 27 та шу каби ёзувларни чизиб қолдирдим, ҳисобот учун уларни суратга олиб жўнатдим. Эртаси куни дўстимни ёрдамга чақирдим. Пулларни электрон ҳамёнга ташлаб беришиб, уларни қандай нақд қилиб олиш йўлини ўргатишди. Қилган ишимдан пушаймонман», — дейди йигитлардан бири.
Ҳозирда ҳолат юзасидан терговга қадар текширув ҳаракатлари амалга оширилмоқда.
Эслатиб ўтамиз, сўнгги йилларда гиёҳванд моддалар тўғрисида реклама вақти-вақти билан Тошкентнинг турли туманларида пайдо бўлаётгани ҳақида хабар берилган эди. Шу сабабли АОКА ИИВ билан биргаликда @stopnarko_bot Telegram ботини ишга туширди. Гиёҳванд моддалар рекламаси ҳақида ушбу Telegram бот орқали хабар бериш мумкин.
Изоҳ (0)