АҚШ Конгрессининг Вакиллар палатаси Украинага қўшимча ёрдам кўрсатиш учун Россия билан боғлиқ активлардан фойдаланишга рухсат берувчи қонун лойиҳасини маъқуллади. Ташаббусни 417 нафар конгрессмен қўллаб-қувватлади, саккиз нафари қарши чиқди. Конгресс қуйи палатаси мажлисининг трансляцияси C-SPAN порталида узатилган.
Ҳужжат муаллифларининг таъкидлашича, ташаббус мусодара қилинган 2 миллион доллар ва ундан ортиқ қийматдаги активларга, жумладан, Россия энергетика компанияларига тегишли активларга ҳам тааллуқли. Қонун, шунингдек, Россия ҳукуматига ёрдам кўрсатиш орқали олинган активларга ҳам таъсир қилади.
Мусодара қилинган воситалар қайта сотилиши кўзда тутилган ва тушган маблағ Украинага ҳарбий, гуманитар ёрдам, шунингдек, мамлакат инфратузилмасини тиклаш ва украиналикларнинг бошқа мамлакатларга кўчирилишида ёрдам кўрсатишга сарфланади.
Аввалроқ АҚШ бош прокурори Мерик Гарлан ушбу ташаббусни қўллаб-қувватлашини маълум қилганди. Маблағларни Украина фойдасига йўналтириш тўғрисидаги қонун март ойи охирида АҚШнинг икки сенатори томонидан тайёрланган. Украинадаги «махсус операцияси» бошланганидан кейин Россия олтин-валюта захираларининг қарийб ярми (643,2 миллиард доллар миқдорида) Ғарб санкциялари остига тушди.
Изоҳ (0)