Канада парламенти Россиянинг Украинадаги ҳаракатларини геноцид деб атовчи резолюцияни қабул қилди

Канада парламентининг қуйи палатаси – Жамоалар палатаси Россиянинг Украинадаги ҳаракатларини геноцид деб атовчи резолюцияни бир овоздан маъқуллади, деб хабар бермоқда Канаданинг Global News нашри.

Қарорда айтилишича, Украина ҳудудида Россия қўшинлари томонидан «тизимли ва оммавий ҳарбий жиноятлар ҳамда инсониятга қарши жиноятлар содир этилгани ҳақида аниқ ва етарли далиллар» мавжуд.

Жамоалар палатасида резолюция бўйича расмий овоз бериш ўтказилмаган. Ҳужжат мажбурлов хусусиятига эга эмас ва Канада ҳукуматини бирор чора кўришга мажбур қилмайди. Халқаро ҳуқуққа кўра, бунинг оқибатлари ҳам бўлмайди.

Резолюция Жамоалар палатасига Янги Демократик партия депутати Хизер Макферсон томонидан тақдим этилган. Унинг сўзларига кўра, шу йўл билан у Канада ҳукуматини Россияга қарши кейинги чоралар кўришга, хусусан, янги санкциялар жорий этишга ундамоқчи бўлган.

«Бу Украинадаги можаро тугамаганини, биз кўрсатаётган ёрдам етарли эмаслигини ва Украина халқи учун кўпроқ иш қилишимиз кераклигини билдиришнинг бир усули», — дея ундан иқтибос келтирган Канаданинг CBC телекомпанияси.

Эслатиб ўтамиз, аввалроқ Россия армиясининг Украинадаги ҳаракатлари Эстония ва Латвия парламентлари томонидан геноцид деб эълон қилинган эди.

Геноцид жиноятининг олдини олиш ва жазолаш тўғрисидаги конвенцияга кўра, геноцид — миллий, этник, ирқий ёки диний гуруҳни тўлиқ ёки қисман йўқ қилишга қаратилган ҳаракат. Конвенцияда БМТ Халқаро жиноий суди маълум бир гуруҳга қарши геноцид содир этилганми ёки йўқми, буни ҳал қилиш ҳуқуқига эга экани айтилган. БМТ суди ҳозирча Россиянинг Украинадаги ҳаракатларини геноцид деб атамаган.

Украина президенти Владимир Зеленский ва АҚШ президенти Жо Байден Россия-Украина урушида содир бўлаётган воқеаларни геноцид деб атаган эди (шу билан бирга, Оқ уй бу Байденнинг шахсий фикри эканини таъкидлаган). Франция президенти Эммануэль Макрон Украинадаги воқеаларга нисбатан «геноцид» сўзини ишлатишни истамаган.

Россия Украинадаги аскарларининг ҳаракатларини геноцид деб ҳисоблашдан бош тортмоқда. Шу билан бирга, Россия расмийлари 2014 йилдан кейин Донбассдаги ҳарбий ҳаракатлар билан боғлиқ воқеаларни геноцид деб атайди. Бу Украинага бостириб киришининг сабабларидан бири сифатида ҳам кўрсатилган. БМТ Бош котиби Антониу Гутерриш Донбассдаги воқеаларни геноцид деб ҳисоблашдан бош тортган.

Канададаги украин диаспораси дунёдаги иккинчи энг йирик украин диаспораси ҳисобланади. Мамлакатда украин миллатига мансуб 1,4 миллионга яқин одам яшайди.