«Виза учун Ўзбекистонга, Zarа учун Қозоғистонга» — санкциялар остида қолган россияликлар вазиятдан чиқиш йўлларни қандай топяпти?

Россия сайёҳлик агентликлари қўшни давлатлар — Ўзбекистон, Қозоғистон, Озарбайжон ва Арманистонга қисқа муддатли саёҳат турларини сотишни бошлади. Бу ҳақда EAN нашри хабар бермоқда.

Саёҳатлар доирасида машҳур дўконларда харид қилиш, валюта сотиб олиш ёки бутун дунё бўйлаб чекловларсиз амал қиладиган банк карталарини очиш имкониятлари таклиф этилмоқда.

Visa ва Mastercard карталари ёрдамида Ўзбекистон, Озарбайжон ва Арманистонга саёҳат  режалари ишлаб чиққан туроператорлар сайёҳларни фақат битта паспорт билан рўйхатдан ўтишини таъминламоқчи.

Туроператорлар сайёҳларга банкка ташриф буюриш ва карта очиш билан боғлиқ барча расмиятчиликларда ёрдам бериш хизматларини олдиндан ишлаб чиққанликларини таъкидлашмоқда. Қайд этилишича, картани олиш муддати атиги бир кун.

Шунингдек, хоҳловчилар ушбу мамлакатлар банкларида евро ва доллар харид қилишлари мумкин бўлади. Нарх турар жой ва дастурга қараб ҳисобланади.

Масалан, VEDI оператори «Виза учун — Ўзбекистон» саёҳат турини ишлаб чиқди. Унинг доирасида туристлар банк картасини очиши мумкин. Экскурсиянинг давомийлиги икки кечадан бошланади. Нархи эса бир киши учун 23 минг рублни ташкил қилади.

Бундан ташқари, Ўзбекистон бўйлаб «Хўжа Насриддин қидирилмоқда» номли ўзига хос ҳунармандчилик саёҳати ҳам тақдим этиляпти. 1 майдан 15 майгача давом этадиган 7-кечалик бу турнинг нархи бир киши учун 57 800 рублни (700 доллар атрофида) ташкил қилади.

Сайёҳларга Тошкент—Бухоро—Самарқанд йўналиши бўйича гуруҳли саёҳат, диққатга сазовор жойларга ташриф буюриш, фольклор кўргазмаси ва самарқандлик дизайнер Валентина Романенконинг модалар кўргазмаси, шунингдек, унинг дўконида буюмлар харид қилиш имкониятлари таклиф этилмоқда.

Бундан ташқари, аҳоли учун яна бир саёҳат тури таклиф қилинади. «Zara учун Қозоғистонга» деб номланган ушбу уч кечалик саёҳат нонушта билан бирга 315 доллар (тахминан 25 200 рубль) деб баҳоланди. Дастурда Нур-Султон шаҳридаги Mega Silk Way ва Xan-Shatyr йирик савдо марказлари, шунингдек, Байтерек, Нур-Алем маркази ва бошқа диққатга сазовор жойларга ташриф буюриш кўзда тутилган.

Best Tour Россия сайёҳлик агентлиги директори Наталя Прибавкина EAN’га маълум қилишича, операторлар фақат ўтган жума куни бундай дўкон саёҳат-турларини тақдим этган. Лекин ҳозирча бу тур учун харидор топилмаган.

Аммо, менимча, бу турга бўлган талаб гарчи оддий таътилдагидек катта бўлмаса-да, лекин топилади. Бундан ташқари, диққатга сазовор жойларда ҳақиқатан ҳам қизиқарли саёҳат қилиш имконияти мавжудлиги бу эҳтимолликни оширади. Йилига бир марта Европага саёҳат қилиб, савдо нуқталарида бутун оила аъзолари учун кийим-кечак сотиб олган сайёҳларим кўп. Бундан ташқари, олдин Грецияга айнан харид қилиш учун уюштириладиган саёҳатлар ҳам жуда машҳур бўлган. Ўйлайманки, МДҲ мамлакатларида уюштириладиган бундай турлар учун ҳам истеъмолчилар пайдо бўлади, — дейди Наталя Прибавкина.

Шунингдек, Урал туризм ассоциацияси ижрочи директори Михаил Мальцев туризм соҳаси вакилларининг ҳар қандай ижодий ташаббусини, жумладан, янги саёҳат турларини олқишлашини қайд этади.

Аввалроқ Ўзбекистонга турли мамлакатлардан келган туристлар қанча пул сарфлашлари маълум қилинган эди.