O‘tkazilgan so‘rovnoma natijalariga ko‘ra, ko‘plab mehnat migrantlari O‘zbekistonga qaytishga shoshilmayapti. Ular yuz berayotgan iqtisodiy qiyinchiliklarga qaramay, Rossiyada qolishni afzal ko‘rmoqda. Bu haqda “Kursiv” nashri xabar berdi.
Mart oyida Rossiya Federatsiyasidan O‘zbekistonga 50 ming mehnat muhojiri qaytgan. Yil boshidan buyon esa bu ko‘rsatkich 133 mingtani tashkil etgan. Taqqoslash uchun: o‘tgan yili Rossiyadan O‘zbekistonga 280 ming mehnat muhojiri qaytgan.
Mart oyi oxirida prezident Shavkat Mirziyoyev mamlakat ichida qo‘shimcha 100 ming kishini rasman ish bilan ta’minlash zarurligini – birinchi navbatda, qaytib kelgan muhojirlar qurilish ishlariga jalb etilishini ta’kidlab o‘tgan edi.
Rossiya O‘zbekiston ishchi kuchining eng yirik importchisi hisoblanadi. Tashqi mehnat migratsiyasi masalalari agentligi ma’lumotlariga ko‘ra, 2021-yilda 1,5 million o‘zbekistonlik xorijda mehnat qilgan bo‘lsa, ularning 1 milliondan ortig‘i Rossiya Federatsiyasida bo‘lgan.
Xorijdan mamlakatga pul o‘tkazmalarining 70 foizi Rossiyadan keladi. O‘zbekistonning ayrim hududlarida xorijdan pul o‘tkazmalari umumiy uy xo‘jaliklari daromadlarining 27,1 foizini tashkil qiladi.
Rossiyada o‘zbekistonlik mehnat muhojirlari 35-45 ming rubl (430-550 dollar) maosh oladi. 2021-yil yakuniga ko‘ra, O‘zbekistonda o‘rtacha oylik ish haqi 3,2 mln so‘mni (280 dollar) tashkil qilgan.
Markaziy bank ma’lumotlariga ko‘ra, rubl kursi Ukrainada urush boshlanishidan oldin (24-fevral) 136,24 so‘m bo‘lgan. 15-martga kelib 97,81 so‘mgacha arzonlashgan. 12-aprelda urushgacha bo‘lgan davrdan ham balandroq –142,96 so‘mni tashkil etgan.
Rossiyadan O‘zbekistonga pul o‘tkazishning bir nechta usullaridan biri bo‘lgan Unistream pul o‘tkazmalari tizimi vakillari shunday izoh berishdi:
Mart oyi boshida Rossiyadan O‘zbekistonga pul o‘tkazmalari hajmi kamaygan, biroq oy o‘rtasidan boshlab bu qiymat yana o‘z holiga qaytgan. Aprel oyining birinchi haftasida Unistream’ning Rossiyadan O‘zbekistonga o‘tkazmalari hajmi 2022-yil mart oyining shu davriga nisbatan 10 barobar ko‘p bo‘ldi.
Tashqi mehnat migratsiyasi masalalari agentligi mehnat muhojirlari o‘rtasida anonim so‘rov o‘tkazdi. Unda taxminan 15 ming respondent ishtirok etdi. Xo‘sh, ular o‘z vatanlariga qaytish yoki Rossiyada ishlash uchun qolib ketishni rejalashtiryaptimi?
Respondentlarning 40 foizi uyiga qaytayotganini bildirgan. Bunga sabab qilib, ulardan deyarli uchdan ikki qismi rublning qadrsizlanishini aytgan bo‘lsa, qolganlari ishsiz qolganini ko‘rsatgan. Respondentlarning 60 foizi Rossiyadan O‘zbekistonga qaytmoqchi emasligini bildirgan.
Moskva viloyati hukumati huzuridagi Millatlar masalalari bo‘yicha maslahat kengashining amaldagi a’zosi Asilbek Egemberdiyev shunday izoh berdi:
Ishsiz qolgan mehnat muhojirlarining aksariyati ish izlab Rossiya Federatsiyasining boshqa hududlariga ko‘chib ketadi.
Egemberdiyevning so‘zlariga ko‘ra, chet ellik ishchilar Kavkazga, Chechenistonga qurilish ishlariga, shuningdek, Rostov viloyatidagi konlarga boradi. Bundan tashqari, uning qayd etishicha, ayrim muhojirlar Rossiya Federatsiyasida sodir etilgan huquqbuzarliklari tufayli uylariga bormaydilar.
Chunki ular Rossiya hududini tark etsa, mamlakatga qayta olmaydi. Shuning uchun ular kamroq maosh evaziga ishlashni davom ettirishdan manfaatdor hisoblanishadi.
Avvalroq “O‘zbekiston Rossiyadan mehnat migrantlarining ommaviy tarzda qaytishiga tayyormi?” mavzusida Tashqi mehnat migratsiyasi agentligi xodimlari bilan suhbat bo‘lib o‘tgan edi.
Izoh (0)