Россияликлар ўртасида Ўзбекистонга кўчиб ўтишга бўлган қизиқиш ўсиб бормоқда. Бу ҳақда «РБК» хабар берди.
Сўнгги бир ярим ой ичида мамлакатга камида 5 000 киши ташриф буюрган. Бу дарҳол Тошкентдаги ижара нархларига таъсир қилди.
Риелторларнинг маълумотларига кўра, фақат 2022 йилнинг февраль ойи охири–март ойи ўрталарида Тошкентда ижара нархлари ўртача 15 фоизга ошган.
Мисол тариқасида Тошкентнинг энг арзон туманлари – Сирғали, Олмазор ва Юнусобод олинадиган бўлса, бу ерда 1 хоналик уй ижараси ойига 3 млн сўм эди, ҳозир эса 3,39 млн сўмни ташкил этмоқда.
Яккасарой ва Миробод туманларида ижара нархи — 5,65 дан 11,3 млн сўмгача. Бу 24 февралгача бўлган нархлардан қарийб 17 фоизга кўпроқдир.
2022 йилнинг биринчи чораги якунларига кўра, бутун мамлакат бўйича уй-жой ижараси ўртача 0,9 фоизга ошди. Давлат статистика қўмитаси маълумотларига кўра, бу ўтган йилнинг шу даврига нисбатан икки баробар кўпдир.
Шунингдек, Тошкентдан ташқари, Жиззах, Наманган ва Хоразм вилоятларида ҳам ижара нархлари ошган.
Риелторларнинг сўзларига кўра, ижара бозорида ҳозирча таклиф етишмовчилиги йўқ. Аммо агар россияликлар оқими давом этса, унда нархлар, албатта, кўтарилади ва етказиб бериш ҳажми сезиларли даражада камаяди.
Россияликлар келгани сабаб Ўзбекистондан ташқари бошқа давлатларда ҳам ижара нархлари ошган. Масалан, Туркияда уй ижараси 2022 йил февраль ойи охирига нисбатан уч-тўрт баробар қимматлашган бўлса, Грузияда бу қиймат 1,5 баробарни ташкил қилмоқда.
Аввалроқ февраль ойи охиридан бошлаб Украинага қарши урушни қўллаб-қувватламайдиган юз минглаб россияликлар бошқа давлатларга, жумладан, Ўзбекистонга кўчиб ўтгани ҳақида хабар берилган эди.
Изоҳ (0)