Тошкентда солиқ тушумлари 50 фоизга, биржада тузилган битимлар қарийб икки баробарга ошган. Йил бошидан бери тадбиркорлик фаолияти қандай бўлмоқда?

Иқтисодий тадқиқотлар ва ислоҳотлар маркази ҳудудлар ва туманлар миқёсида тадбиркорлик фаолиятини ўрганди. Бу ҳақда марказ матбуот хизмати «Дарё»га маълум қилди.

Жорий йилнинг 1 январидан 31 мартигача бўлган даврда республикада солиқ тушумлари ҳажми ўтган йилнинг шу даврига нисбатан 17,4 фоизга ошган.

Жумладан, Бухоро (42,4 фоиз), Фарғона (40,8 фоиз), Хоразм (36,6 фоиз), Самарқанд (35,7 фоиз), Андижон (32,2 фоиз) вилоятларида, Қорақалпоғистон Республикаси (32,8 фоиз) ва Тошкент шаҳрида (49,0 фоиз) солиқ тушумларининг сезиларли ўсиши қайд этилди.

Солиқ тушумларининг ўсиши солиқ базасини кенгайтириш, иқтисодий ўсиш, солиқ маъмуриятчилиги тизимини такомиллаштириш ва тадбиркорлик фаолиятини қонунийлаштириш ҳисобига таъминланди.

Таҳлил қилинаётган давр учун божхона тўловлари бўйича тушумлар 45,7 фоизга ошди. Даромаднинг энг катта ўсиши Жиззах (2,8 баробар), Сирдарё (2,0 баробар), Хоразм (1,9 баробар), Қашқадарё (77,8 фоиз), Бухоро (70,1 фоиз) ва Андижон (62,7 фоиз) вилоятларида кузатилди.

Божхона тушумларининг ўсиши импорт ҳажмининг ва валюта айирбошлаш курсининг ўсиши, товарларни эркин муомалага чиқариш жараёнларини тезлаштириш ҳисобига таъминланди. Бундан ташқари божхона маъмуриятчлигига янги методларни жорий эта бошлади.

Давлат божхона қўмитаси маълумотларига кўра, йил бошидан буён товарлар экспорти ҳажми ўтган йилнинг шу даврига нисбатан 12,2 фоизга ошган. Товарлар экспорт ҳажмининг ўсиши Қашқадарё (63,4 фоиз), Наманган (44,2 фоиз), Фарғона (38,1 фоиз), Самарқанд (35,4 фоиз), Сирдарё (29,1 фоиз) ва Навоий (17,6 фоиз) вилоятларида қайд этилди.

Ўзбекистон экспортининг ўсиши саноат маҳсулотлари, озиқ-овқат маҳсулотлари, кимё ва қишлоқ хўжалиги маҳсулотлари экспортининг ўсиш суръатлари билан изоҳланади, — дейди марказ таҳлилчиси.

Берилган кредитлар ҳажмининг ўсиши Андижон (83,5 фоиз), Самарқанд (59,5 фоиз), Фарғона (26,3 фоиз) вилоятларида ва Тошкент шаҳрида (18,5 фоиз) кузатилган.

Марказий банк маълумотларига кўра, ўтган йили айнан шу даврда (2021 йил январь ва февраль) иқтисодиётнинг реал секторидаги йирик лойиҳаларга кредитлар ажратилган. Ҳисобот даврида асосан ушбу лойиҳалар учун кредитларни қайтариш бўйича операциялар амалга оширилмоқда.

Таҳлил қилинаётган даврда Ўзбекистон Республикаси товар-хом ашё биржасида тузилган битимлар ҳажми 43,8 фоизга ўсди. Биржада савдо фаоллигининг сезиларли ўсиши Навоий (62,7 фоиз), Жиззах (60,3 фоиз), Хоразм (46,6 фоиз) вилоятлари, Қорақалпоғистон Республикасида (64,7 фоиз) ва Тошкент шаҳрида (92,3 фоиз) кузатилди.

Ушбу ҳудудларда тузилган битимлар ҳажмининг ўсиши автомобиль бензини, дизель ёқилғиси, қора металлар, пахта толаси, катод қопламали металл, полиэтилен, озуқабоп буғдой, қурилиш материаллари, спиртли ичимликлар ва бошқалар каби товарлар савдосини кўпайтириш орқали таъминланган.

Бу даврда 49 923 та янги тадбиркорлик субъектлари ташкил этилиб, уларнинг энг кўпи Самарқанд (6 149), Фарғона (4 702), Тошкент (4 305), Андижон (4 119), Қашқадарё (3 835) вилоятларида ва Тошкент (6 990) шаҳрида рўйхатга олинган.

Аввалроқ Иқтисодий тадқиқотлар ва ислоҳотлар маркази томонидан Ўзбекистоннинг энг фаол банклари аниқланган эди.