Бухоро вилоятига Туркманистондан жами қиймати 3,2 миллиард сўм бўлган маҳсулотлар яширин тарзда олиб кирилгани аниқланди. Бу ҳақда «Дарё»га вилоят Божхона бошқармаси ахборот хизмати раҳбари Жавоҳир Исмоилов хабар берди.
Таъкидланишича, 2022 йилнинг 11 апрель куни вилоят Божхона бошқармаси «Олот» чегара божхона постида қўшни давлатлардан кириб келаётган юк автомашиналари белгиланган тартибда Rapiscan инспексион кўрик мажмуаси орқали назоратдан ўтказилган. Барча юк автомашиналарининг юк кузатув ҳужжатлари ва рентген тасвири таҳлил қилинган.
Шу жараёнда, чегара постига Туркманистондан икки юк автомашинаси кириб келган. Биринчи юк автомашина божхона кўригидан ўтказилганда, унинг юк салонида ҳужжатларда қайд этилганидан 1,8 миллиард сўмдан ортиқ турли хилдаги кийим-кечаклар борлиги аниқланган. Иккинчи юк автомашинада эса 19 номдаги қиймати 1 миллиард 66 миллион сўмга тенг бўлган автомобиль эҳтиёт қисмлари, 155 дона чангютгич ва уй-рўзғор буюмлари антисанитар ҳолатда топилган.
Ҳар икки юк автомашинаси ҳайдовчиси Туркманистондан яширин равишда олиб кирилаётган мазкур товарлар Бухородаги савдо жамиятларига тегишли эканини билдирган.
Ҳозирда ушбу ҳолатлар юзасидан божхона органлари томонидан суриштирув ҳаракатлари давом эттирилмоқда.
Изоҳ (0)