Украина хавфсизлик хизмати (СБУ) ходимлари томонидан ҳибсга олинган «Мухолифат платформаси — Ҳаёт учун» партияси сиёсий кенгашининг раҳбари, халқ депутати Виктор Медведчук Россия фуқароси эмас ва Россиянинг Украинадаги ҳарбий амалиётига унинг алоқаси йўқ, деди Россия президентининг вакили Дмитрий Песков. Шу тарзда у Украина президенти Владимир Зеленскийнинг Медведчукни украиналик асирларга алмаштириш ҳақидаги таклифига жавоб қайтарди.
«Медведчукнинг ўзи ҳам унга нисбатан бундай туҳматли вазиятни ҳал қилишда Россиянинг қандайдир иштирокини хоҳлайдими ёки йўқ, умуман билмаймиз», — дея қўшимча қилди Песков.
Сиёсатчининг ҳибсга олинишига изоҳ берар экан, у буни «Киев режими аслида қандай эканига ёрқин мисол» деб атади. Песков, шунингдек, Медведчук «ўз нуқтаи назари ва позициясига эга бўлган» мухолифат партиясини бошқаришини қўшимча қилди. Унинг таъкидлашича, сиёсатчи ҳар доим «урушга, Донбассдаги можаронинг кенгайишига қарши» бўлиб келган ва агар Украина расмийлари ҳам бу ғояларни ҳисобга олганида «ҳарбий операция ўтказилмаган бўларди».
12 апрель оқшомида Украина президенти Владимир Зеленский қўлига кишан солинган ва ҳарбий кийимидаги Медведчукнинг суратини эълон қилди. Шу билан бирга, у СБУга махсус операция ўтказгани учун миннатдорлик билдирди. Кейинроқ махсус хизмат Медведчукнинг ҳибсга олинганини тасдиқлади. Зеленский Россияга Медведчукни «асирликдаги украиналик йигит-қизлар»га алмаштиришни таклиф қилди.
Бу орада Виктор Медведчукнинг рафиқаси Оксана Марченко Владимир Зеленскийга мурожаат қилиб, ҳибсда сақланаётган турмуш ўртоғини зудлик билан озод этишни талаб қилди.
«Мен — Украина халқ депутати Виктор Медведчукнинг рафиқаси Оксана Марченко президент Зеленскийга мурожаат қиламан. СБУ томонидан ноқонуний ҳибсда сақланаётган турмуш ўртоғим Виктор Владимирович Медведчукни зудлик билан озод қилиш учун барча зарур чораларни кўришингизни сўрайман», — деди у YouTube каналида эълон қилинган видеомурожаатида.
«Виктор Владимирович Украина қонунларини бузмаган ва ўз ҳудудини тарк этмаган», — деди Марченко.
Унинг сўзларига кўра, Медведчук ноқонуний равишда ва фақат сиёсий мотивларга кўра таъқиб қилинмоқда. «У доим Украинада тинчлик ва мулоқот, тотувлик тарафдори бўлиб келган. Сиз, жаноб президент, буни жуда яхши биласиз. Ҳеч шубҳа йўқки, менинг эрим Украина қонунлари ва халқаро ҳуқуққа зид равишда сиёсий мотивларга кўра таъқиб қилинмоқда. Унинг ҳаёти хавф остида бўлса керак, мен сизнинг жавобингизни кутаман».
Шунингдек, Марченко Туркия президенти Ражаб Тоййиб Эрдўғонга мурожаат қилиб, турмуш ўртоғини озод қилишда ёрдам сўраган.
Виктор Медведчук Украинадаги Россия тарафдори бўлган энг обрўли сиёсатчилардан бири ҳисобланарди. ОАВда уни Россия президенти Владимир Путиннинг «қадрдони» деб ҳам аташган. Медведчук устидан давлатга хиёнат, Россия ҳукумати билан тил бириктириш ва бошқа қатор ишлар бўйича тергов олиб борилмоқда. У уй қамоғида эди, бироқ 2022 йил февралида Украина Ички ишлар вазирлиги унинг қочиб кетгани ҳақида хабар берди.
Изоҳ (0)